বেলুচ কর্মীক পাক সেনাৰ ৰাসায়নিক আক্রমণ

নিয়মীয়া বাৰ্তা ১০ অক্টোবৰঃ  পাকিস্তানী সেনাই বেলুচিস্তান আৰু সিন্ধ প্রদেশৰ বিক্ষুব্ধ জনতাৰ বিৰুদ্ধে ৰাসায়নিক অস্ত্র ব্যৱহাৰ কৰিছে৷ সিন্ধ প্রদেশৰ পৰা ইতিমধ্যে সিন্ধি আৰু উর্দুভাষী বহু কর্মীক অপহৰণ কৰিছে পাকিস্তানী সংস্থাই৷ বেলুচ আৰু সিন্ধি লোকসকলৰ বিৰুদ্ধে ৰাসায়নিক অস্ত্র ব্যৱহাৰ কৰি পাকিস্তানে যুদ্ধ অপৰাধ সংঘটিত কৰাৰ উপৰি মানৱ অধিকাৰ উলংঘা কৰিছে৷ উল্লেখনীয় যে দুয়োখন প্রদেশত প্রতিবাদী কর্মীসকলৰ ওপৰত পাকিস্তানে চলাই থকা পাশৱিক আতিশয্যৰ ঘটনাক লৈ ইতিমধ্যে বিশ্বজুৰি বেলুচ নেতাসকলে প্রতিবাদ সাব্যস্ত কৰি আছে৷ লক্ষণীয়ভাৱে হাজাৰ হাজাৰ বেলুচ ৰাষ্ট্রীয়তাবাদী কর্মী বিগত এটা দশকৰ ভিতৰত সন্ধানহীন হৈছে বিলুচিস্তানত৷ আনকি সেনাই বিভিন্ন সময়ত মিছা অভিযোগ তুলি হত্যা কৰা বেলুচ কর্মীসকলৰ মৃতদেহো পৰিয়ালক ঘূৰাই দিয়া নাই৷ শেহতীয়াকৈ এই অভিযোগ কৰিছে বেলুচ ৰাষ্ট্রীয়তাবাদী নেতা ড০ আল্লাহ নাজাৰ বেলুচে৷ নাজাৰৰ মতে, বিভিন্ন সময়ত পাকিস্তানী সেনাই বেলুচ লোকসকলৰ প্রতিবাদী কণ্ঠ স্তব্ধ কৰিবলৈ ৰাসায়নিক অস্ত্র ব্যৱহাৰ কৰিছে৷ ড০ নাজাৰ বেলুচৰ এই বিবৃতি শেহতীয়াকৈ সংবাদ মাধ্যমত প্রকাশ পোৱাৰ পাছতে আন্তর্জাতিক মঞ্চত বিষয়টোক লৈ চলিছে সৰৱ চর্চা৷ বেলুচ নেতাগৰাকীৰ মতে, পাক প্রশাসনে অধিকাৰৰ দাবীত সৰৱ হোৱা সিন্ধি আৰু উর্দুভাষী যুৱক–যুৱতীসকলক্ শেহতীয়াকৈ আক্রমণৰ লক্ষ্য হিচাপে বাছি লৈছে৷ প্রতিবাদী কার্যসূচী গ্রহণ কৰিলেই সিন্ধি–উর্দুভাষী যুৱক–যুৱতীসকলক্ পাক বাহিনীয়ে অপহৰণ কৰি নৃশংসভাৱে হত্যা কৰাৰো অভিযোগ আনিছে ড০ নাজাৰ বেলুচে৷ বেলুচ নেতাগৰাকীৰ অভিযোগ অনুসৰি বিভিন্ন সময়ত চীনৰ পৰা ৰাসায়নিক আৰু জৈৱিক অস্ত্র লাভ কৰিছে পাকিস্তানী সেনাই৷ গতিকে গ্রেপ্তাৰ হোৱা বেলুচ কর্মীসকলৰ বিৰুদ্ধে সেনাই নিজৰ জিম্মাত জৈৱিক আৰু ৰাসায়নিক অস্ত্র ব্যৱহাৰ কৰি নৃশংসভাৱে হত্যা কৰি আহিছে বুলিও নেতাগৰাকীয়ে বিবৃতিটোত উল্লেখ কৰে৷