নিয়মীয়া বাৰ্তা, ১২ অক্টোবৰঃ ক’ভিড–১৯ মহামাৰীত লেটিন আমেৰিকান ৰাষ্ট্র ব্রাজিলত প্রাণ হেৰুওৱা লোকৰ সংখ্যাই ডেৰ লাখ অতিক্রম কৰিছে৷ দেশখনৰ স্বাস্থ্য মন্ত্রালয়ে সদৰী কৰিছে এই তথ্য৷ বিশ্বৰ ভিতৰত ক’ভিড–১৯ মহামাৰীত অধিকসংখ্যক লোকে প্রাণ হেৰুওৱা দেশৰ তালিকাত দ্বিতীয় স্থানত আছে ব্রাজিল৷
উল্লেখনীয় যে আমেৰিকাৰ পাছতে ব্রাজিলত গৰিষ্ঠসংখ্যক লোক ক’ভিড মহামাৰীত মৃত্যুমুখত পৰিছে৷ ইফােলে, সংক্রমিত লোকৰ তালিকাত পৃথিৱীৰ ভিতৰত তৃতীয় স্থানত আছে দেশখন৷ এই তালিকাত প্রথম দুটা স্থানত আছে আমেৰিকা আৰু ভাৰত৷
স্মর্তব্য যে ক’ভিড মহামাৰীৰ সংক্রমণত প্রতিৰোধ লগোৱাৰ ক্ষেত্রত ৰাষ্ট্রপতি জাইৰ ব’লছ’নাৰোৱে গুৰুত্ব প্রদান নকৰা বুলি দেশজুৰি সৃষ্টি হৈছিল সমালোচনা৷ লক্ষণীয়ভাৱে ড’নাল্ড ট্রাম্পৰে পিছতে ক’ভিড–১৯ক লৈ টুলুঙা মন্তব্য কৰা নেতা হিচাপে বিশ্বত চিহ্ণিত হৈছিল ব’লছ’নাৰো৷