গুৱাহাটীৰ বামুণীমৈদামত ৰে’ল ইঞ্জিন জব্দ কৰিলে বন বিভাগে

নিয়মীয়া বাৰ্তা, ২১ অক্টোবৰঃ এন এফ ৰে’লৱেৰ বামুণীমৈদামৰ ডিজেল লোকো শ্বেডত কালি বন বিভাগে অভিযান চলাই এটা ৰে’লৰ ইঞ্জিন জব্দ কৰে৷ বন বিভাগ আৰু ৰে’ল বিভাগৰ বিষয়াৰ উপস্থিতিত চলোৱা এই অভিযানত ১২৪৪০ নম্বৰৰ মালবাহী ৰে’লৰ ইঞ্জিনটো জব্দ কৰে৷

বন বিভাগৰ বিষয়াই জানিবলৈ দিয়া মতে যোৱা ২৭ ছেপ্টেম্বৰত মালবাহী ৰে’লখনে লামডিং বনাঞ্চলত দুটা বন্যহস্তী খুন্দিয়াইছিল৷ বন্যপ্রাণী আইন উলংঘাকাৰী ৰে’লখনৰ চালকে মৃত হাতীৰ পোৱালিটো প্রায় ১ কিলোমিটাৰ চোঁচৰাই নিছিল৷

বন বিভাগৰ অভিযোগৰ ভিত্তিত এন এফ ৰে’লৱে কর্তৃপক্ষই ১২৪৪০ নম্বৰৰ ৰে’লৰ ইঞ্জিনটোৰ চালক আৰু সহযোগী চালকক ইতিমধ্যে চাকৰিৰ পৰা নিলম্বন কৰিছে৷ লক্ষণীয় যে বন্যহস্তীক খুন্দিয়াই হত্যা কৰাৰ অভিযোগত বন বিভাগে ৰে’লৰ ইঞ্জিন জব্দ কৰাটো ব্যতিক্রমী ঘটনা হিচাপে চর্চা লাভ কৰিছে৷