নিয়মীয়া বাৰ্তা, ১ ডিচেম্বৰঃ আজি বিয়লি তিতাবৰ মহকুমাৰ বৰহোলা তিনিআলিত এ এছ ০৩- ৯০৩০ নম্বৰৰ এখন গ্ৰেণ্ড আই টেন গাড়ীয়ে নিয়ন্ত্ৰণ হেৰুৱাই দৈনিক বজাৰৰ কেইবাজনো বেপাৰীক মহটিয়াই নিয়াত প্ৰায় ৮ জন লোক গুৰুতৰভাৱে আহত হয়। জানিব পৰা মতে, বিয়লি তিতাবৰ দিশৰ পৰা আহি থকা গ্ৰেণ্ড আইটেন গাড়ীখনে বৰহোলা তিনি আলিৰ কেঁকুৰি এটা পাৰ হওঁতে চালকজনে নিয়ন্ত্ৰণ হেৰুৱাই পেলায়।
ফলত গাড়ীখনে তীব্ৰ গতিৰে পথৰ ওপৰত বহা দৈনিক বজাৰৰ বেপাৰীসকলক এফালৰ পৰা খুন্দিয়াই নিয়ে, যাৰ বাবে বেপাৰী আৰু দুজনমান পথচাৰী গাড়ীৰ খুন্দাত গুৰুতৰভাবে আঘাতপ্ৰাপ্ত হয়। দুৰ্ঘটনাত বৰহোলাৰ নাহিদ আলী, সুৰেশ চাওতাল, পুৰন কৰ্মকাৰ, নোমল বৰা, সুনন্দ বৰা, অজয় তুৰী আৰু লুমনু কৰ্মকাৰ গুৰুতৰভাৱে আহত হয়।
আহতসকলক ততালিকে বৰহোলা সামূহিক চিকিৎসালয়ত ভৰ্তি কৰোৱা হৈছিল যদিও আঘাত গুৰুতৰ হোৱাৰ বাবে পিছত যোৰহাট চিকিৎসা মহাবিদ্যালয়লৈ উন্নত চিকিৎসাৰ বাবে প্ৰেৰণ কৰা হয়। জানিব পৰা মতে, গাড়ীখনৰ চালক মেদিনী বৰুৱাক ইতিমধ্যে বৰহোলাৰ আৰক্ষীয়ে গ্ৰেপ্তাৰ কৰিছে।