গোলকীয় উষ্ণতা বৃদ্ধিত অৰিহণা ধনকুবেৰৰ

নিয়মীয়া বাৰ্তা ১০ ডিচেম্বৰঃ বিশ্বজুৰি গোলকীয় উষ্ণতা বৃদ্ধিৰ ক্ষেত্রত সমৃদ্ধিশালী লোকসকলেই আটাইতকৈ জগৰীয়া৷ শেহতীয়াকৈ ৰাষ্ট্রসংঘৰ এক প্রতিবেদনত উল্লেখ কৰা হৈছে যে বিশ্বত ১ শতাংশ আটাইতকৈ ধনী ব্যক্তিয়ে ৫০ শতাংশ আটাইতকৈ দুখীয়া লোকে নিঃসৰণ ঘটোৱা কার্বনতকৈ দুগুণ বেছি কার্বন নিঃসৰণ কৰি আহিছে৷ কার্বন নির্গমনৰ ব্যৱধান পৰীক্ষা কৰি ৰাষ্ট্রসংঘৰ বিষয়ববীয়াই উল্লেখ কৰিছে যে আটাইতকৈ ধনী লোকসকলে কার্বন নির্গমন ব্যাপক হাৰত কর্তন কৰিব লাগিব বিপজ্জনক উষ্ণতাৰ পৰা ৰক্ষা কৰিবলৈ৷ স্মর্তব্য যে চলিত শতিকাটোত গোলকীয় উষ্ণতা বৃদ্ধিৰ ক্ষেত্রত সমৃদ্ধিশালী দেশ তথা ধনকুবেৰ লোকসকলে অধিক ইন্ধন যোগাই আহিছে৷ ৰাষ্ট্রসংঘই চলোৱা এক অধ্যয়ন অনুসৰি ক’ভিড–১৯ প্রতিৰোধী গোলকীয় লকডাউনে জলবায়ু পৰিৱর্তনৰ ক্ষেত্রত কিছু ইতিবাচক প্রভাৱ পেলাব যদিও জলবায়ুৰ উষ্ণতা বৃদ্ধি প্রতিৰোধ ইয়াৰ দ্বাৰা সম্ভৱ নহ’ব৷ ৰাষ্ট্রসংঘৰ এনভাইৰনমেণ্ট প্রগ্রেম শীর্ষক এক অধ্যয়নত উল্লেখ কৰা হৈছে যে কার্বন নিঃসৰণৰ বিষয়টোত অতি দুখীয়া লোকসকলতকৈ আটাইতকৈ ধনী লোকসকলে অধিক গুৰুত্ব প্রদান কৰিব লাগে৷ স্মর্তব্য যে চলিত বর্ষত মহামাৰীৰ বাবে কার্বন নিঃসৰণ ৭ শতাংশ হ্রাস পাইছে৷ ইয়াৰ জৰিয়তে .০১ ডিগ্রী চেণ্টিগ্রেডহে উষ্ণতা হ্রাস পাব ২০৫০ চনৰ ভিতৰত৷ উল্লেখনীয় যে বিশ্বৰ আটাইতকৈ শীর্ষত থকা ১০ শতাংশ উপার্জনকাৰীয়ে স্থল পৰিবহণত ৪৫ শতাংশ শক্তি ব্যৱহাৰ কৰাৰ বিপৰীতে বিমান পৰিবহণত ৭৫ শতাংশ শক্তি ব্যৱহাৰ কৰে৷ ইফালে, আটাইতকৈ দুখীয়া ৫০ শতাংশ লোকে স্থল পৰিবহণত ১০ শতাংশ আৰু বিমান পৰিবহণত ৫ শতাংশ শক্তি খৰচ কৰে৷ অর্থাৎ কার্বন নির্গমনৰ বাবে জগৰীয়া বিশ্বৰ ধনকুবেৰ লোকসকল৷