নিয়মীয়া বাৰ্তা ১ জানুৱাৰীঃ অষ্ট্রেলিয়াৰ বিৰুদ্ধে ঐতিহাসিক বক্সিং ডে’ টেষ্টত শতকীয় ইনিংছ খেলাৰ সুবাদত টীম ইণ্ডিয়াৰ ভাৰপ্রাপ্ত অধিনায়ক আজিংক্য ৰাহানেই আই চি চিৰ টেষ্ট ৰেংকিঙত উত্থান লাভ কৰিবলৈ সক্ষম হৈছে৷ মেলব’ন টেষ্টত ১১২ আৰু অপৰাজিত ২৭ ৰানৰ দায়িত্বপূর্ণ ইনিংছ খেলা মিডল অর্ডাৰ বেটছমেনগৰাকীয়ে আজি প্রকাশিত টেষ্ট ৰেংকিঙৰ বেটিং তালিকাত ষষ্ঠ স্থানলৈ উন্নীত হৈছে৷
ইফালে, মেলব’নত ভাৰতৰ জয়ত গুৰুত্বপূর্ণ ভূমিকা গ্রহণ কৰা তাৰকা অফ স্পীনাৰ ৰবিচন্দ্রন অশ্বিনে দুটা স্থান আগুৱাই সপ্তমলৈ উন্নীত হৈছে৷ একেদৰে ৰবীন্দ্র জাদেজাই অলৰাউণ্ডাৰৰ ৰেংকিঙত তৃতীয় স্থানত অক্ষুণ্ণ আছে৷ টীম ইণ্ডিয়াৰ অধিনায়ক বিৰাট কোহলিয়ে মেলব’ন টেষ্টৰ পৰা নাম প্রত্যাহাৰ কৰিলেও টেষ্ট ৰেংকিঙৰ দ্বিতীয় স্থান অক্ষুণ্ণ ৰাখিবলৈ সক্ষম হৈছে৷ নিউজিলেণ্ডৰ অধিনায়ক কেন উইলিয়ামছনে কোহলি আৰু ষ্টিভেন স্মিথক অতিক্রম কৰি ৰেংকিঙৰ শীর্ষস্থানলৈ উন্নীত হৈছে৷