নিয়মীয়া বাৰ্তা ১৫ ফ্ৰেব্ৰুৱাৰীঃ সমগ্ৰ ৰাজ্যতে গ্ৰামাঞ্চলৰ যুৱক যুৱতী সকলৰ ক্ৰীড়াৰ জৰিয়তে যাতে শাৰীৰিক আৰু মানসিক উৎকৰ্ষ সাধন কৰিব পাৰে তাৰ লক্ষ্যৰে মুখ্যমন্ত্ৰী সমগ্ৰ গ্ৰাম্য উন্নয়ন যোজনাৰ অধীনত নিৰ্মাণ কৰা হৈছিল ৪০০ খন খেল পথাৰ ৷ আজি সেই খেল পথাৰ সমূহ আনুষ্ঠানিক ভাৱে শুভাৰম্ভ কৰাৰ সমান্তৰালকৈ মৰিগাঁও জিলাৰ চৰাইবাহী ক্ৰীড়া সন্থাৰ খেল পথাৰ খনো আনুষ্ঠানিক ভাৱে শুভ উদ্বোধন কৰা হয় ৷ মুখ্যমন্ত্ৰীৰ সমগ্ৰ গ্ৰাম্য উন্নয়ন যোজনাৰ অধীনত নিৰ্মিত হোৱা চৰাইবাহী খেল পথাৰ খন আজি শুভ উদ্বোধন কৰে তিৱা স্বায়ত্ত্বশাসিত পৰিষদৰ মূখ্য কাৰ্যবাহী সদস্য জীৱন চন্দ্ৰ কোঁৱৰে ৷ আনহাতে এই খেল পথাৰ শুভ উদ্বোধন কাৰ্যসূচীৰ লগত সংগতি ৰাখি দুটা ফুটবল দল , চৰাইবাহী ক্ৰীড়া সন্থা আৰু বালিগাঁও ক্ৰীড়া সন্থাৰ মাজত এখনি প্ৰীতি ফুটবল খেল অনুষ্ঠিত হয় ৷ এই অনুষ্ঠানতে চৰাইবাহী ক্ৰীড়া সন্থাৰ তৰফৰ পৰা অঞ্চলৰ প্ৰবীন খেলুৱৈ ক্ৰমে ভগৱান ভৰালী , নৰেন্দ্ৰ কুমাৰ নাথ , সুনন্দ বৰদলৈক সম্বৰ্ধনা জনোৱা হয় ৷