কেৰিয়াৰশ্রেষ্ঠ সপ্তম স্থানলৈ উন্নীত ঋষভ পণ্ট

নিয়মীয়া বাৰ্তা ১১ মাৰ্চঃ আই চি চি টেষ্ট ৰেংকিঙৰ কেৰিয়াৰশ্রেষ্ঠ সপ্তম স্থানলৈ উন্নীত হ’ল টীম ইণ্ডিয়াৰ প্রতিভাৱান উইকেটকীপাৰ বেটছমেন ঋষভ পণ্ট৷ ইংলেণ্ডৰ বিপক্ষে সদ্যসমাপ্ত চাৰিখনীয়া টেষ্ট শৃংখলাটোত উন্নত বেটিং প্রদর্শন দাঙি ধৰাৰ সুবাদত ঋষভ পণ্টে আই চি চিয়ে আজি ঘোষণা কৰা টেষ্ট ৰেংকিঙৰ বেটছমেন শাখাৰ সপ্তম স্থানটো অধিকাৰ কৰিবলৈ সক্ষম হয়৷ সাতটা স্থান আগুৱাই পণ্টে এই স্থানটো অধিকাৰ কৰে৷ ঋষভ পণ্টে টীম ইণ্ডিয়াৰ তাৰকা অ’পেনাৰ ৰোহিত শর্মা আৰু নিউজিলেণ্ডৰ হেনৰী নিকলছৰ সৈতে যুটীয়াভাৱে সপ্তম স্থানটো অধিকাৰ কৰি আছে৷ বর্তমান তিনিওগৰাকী খেলুৱৈৰ ৰেংকিং পইণ্ট হ’ল ৭৪৭৷ ৰোহিত শর্মাৰো ৰেংকিঙত এটা স্থানৰ উন্নতি ঘটিছে৷ নিউজিলেণ্ডৰ অধিনায়ক কেন উইলিয়ামছনে শীর্ষস্থান দখল কৰি থকা বেটছমেন শাখাত টীম ইণ্ডিয়াৰ অধিনায়ক বিৰাট কোহলিৰ স্থানৰ কোনো লৰচৰ হোৱা নাই৷ ৮১৪ পইণ্টেৰে কোহলিয়ে পঞ্চম স্থানটো অক্ষুণ্ণ ৰাখিছে৷ অষ্ট্রেলিয়াৰ ষ্টিভেন স্মিথে দ্বিতীয় আৰু মার্নাছ লাবুছানেই তৃতীয় স্থানটো অধিকাৰ কৰি আছে৷ আনহাতে, বলিং শাখাত টীম ইণ্ডিয়াৰ তাৰকা স্পিনাৰ ৰবিচন্দ্রন অশ্বিনে দ্বিতীয় স্থানটো অধিকাৰ কৰিছে৷ অষ্ট্রেলিয়াৰ পেট কামিনছে শীর্ষস্থান দখল কৰি থকা বলিং শাখাত অশ্বিনে নিউজিলেণ্ডৰ নেইল ৱাগনাৰক আঁতৰাই দ্বিতীয় স্থানটো অধিকাৰ কৰে৷ ইপিনে, ৱেষ্ট ইণ্ডিজৰ জেছন হল্ডাৰে শীর্ষস্থান দখল কৰি থকা অলৰাউণ্ডাৰ শাখাৰ চতুর্থ স্থানলৈ উন্নীত হৈছে ভাৰতৰ ৰবিচন্দ্রন অশ্বিন৷