শীঘ্রে বিক্রী কৰিব অ’এনজিচিৰ পান্না–মুক্তা–ৰত্না–আৰ্ ছিৰিজ তৈলক্ষেত্র

নিয়মীয়া বাৰ্তা ২৭ এপ্ৰিলঃ দেশজুৰি ক’ভিডৰ বিভীষিকা অব্যাহত থকাৰ মাজতে ৰাজহুৱা খণ্ডৰ তৈলক্ষেত্র ব্যক্তিগতকৰণৰ বাবে কেন্দ্রীয় চৰকাৰে গ্রহণ কৰিছে এটা বৃহৎ পদক্ষেপ৷ ভাৰতীয় তেল আৰু প্রাকৃতিক গেছ নিগম লিমিটেড, চমুকৈ অ’ এন জি চিৰ কেইবাখনো তৈলক্ষেত্র ব্যক্তিগতকৰণৰ বাবে ভাৰত চৰকাৰৰ পেট্র’লিয়াম মন্ত্রালয়ে প্রতিষ্ঠানটোলৈ প্রেৰণ কৰিছে এখন বিশেষ পত্র৷ পত্রখনত পান্না–মুক্তা, ৰত্না আৰু আৰ ছিৰিজৰ তৈলক্ষেত্রসমূহত থকা নিজৰ অংশীদাৰিত্ব বিক্রী কৰিবলৈ অ’ এন জি চি কর্তৃপক্ষক স্পষ্ট নির্দেশ দিয়া হৈছে৷ লগতে উক্ত তৈলক্ষেত্রসমূহত চলি থকা সকলো খনন শীঘ্রে বন্ধ কৰিবওৈ কোৱা হৈছে৷ তৈলক্ষেত্র ব্যক্তিগতকৰণৰ দিশত নৰেন্দ্র মোদী নেতৃত্বাধীন কেন্দ্রীয় চৰকাৰখনৰ এয়া অত্যন্ত স্পষ্ট আৰু কঠোৰ পদক্ষেপ হিচাপে বিবেচিত হৈছে৷ ইয়াৰ লগে লগে বিক্রীৰ বাবে সাজু কৰা তৈলক্ষেত্রসমূহৰ আন্তঃগাঁথনিৰ মূল্যমান নির্ধাৰণৰ কামো আৰম্ভ হৈছে৷

উল্লেখ্য যে ভাৰত চৰকাৰৰ পেট্র’লিয়াম মন্ত্রালয়ৰ অতিৰিক্ত সচিব অমৰ নাথে যোৱা ১ এপ্রিলত অ’ এন জি চিৰ চি এম ডি সুভাষ কুমাৰলৈ সাত দফীয়া পৰিকল্পনা সন্নিৱিষ্ট বিশেষ পত্রখন প্রেৰণ কৰিছিল৷ পত্রখনত ২০২৩–২৪ চনত এক তৃতীয়াংশ উৎপাদন বৃদ্ধিৰ স্বার্থত কেতবোৰ গুৰুত্বপূর্ণ পদক্ষেপ গ্রহণ কৰাৰ বিষয়ে উল্লেখ কৰা হৈছে৷ এই পৰিকল্পনাৰ অংশ হিচাপে পশ্চিম উপকূলীয় আৰু ভূপৃষ্ঠত থকা পান্না–মুক্তা, ৰত্না আৰু আৰ ছিৰিজৰ তৈলক্ষেত্রসমূহ ব্যক্তিগত খণ্ডৰ হাতত বিক্রী কৰা হ’ব৷ এইদৰে তৈলক্ষেত্রসমূহ বিদেশী প্রতিষ্ঠানৰ হাতত গতোৱাৰ পথো প্রশস্ত হৈ পৰিব৷ প্রণিধনযোগ্য যে তৈলক্ষেত্র বিক্রীৰ বাবে এয়া হৈছে কেন্দ্রীয় চৰকাৰৰ তৃতীয়টো প্রচেষ্টা৷

ইয়াৰ পূর্বে ২০১৭ চনৰ অক্টোবৰ মাহত হাইড্র’কার্বনৰ সঞ্চালকপ্রধানে ৭৯১.২ মিলিয়ন টন খাৰুৱা তেল আৰু ৩৩৩.৪৬ বিলিয়ন কিউবিক মিটাৰ গেছসম্পন্ন ১৫খন লাভজনক তৈলক্ষেত্র ব্যক্তিগত খণ্ডৰ হাতত গতোৱাৰ পৰিকল্পনা যুগুতাই উলিয়াইছিল৷ কিন্তু অ’ এন জি চিৰ তীব্র বিৰোধিতাৰ বাবে সেয়া সম্ভৱ হৈ নুঠিল৷ ইয়াৰ পৰৱর্তী পর্যায়ত ২০১৯ চনৰ ফেব্রুৱাৰীত কেন্দ্রীয় চৰকাৰৰ কেবিনেটে অ’ এন জি চিৰ ৬৪খন তৈলক্ষেত্র ব্যক্তিগতকৰণৰ সিদ্ধান্তত অনুমোদন জনায়৷ এই বিষয়টোক লৈও দেশজুৰি তীব্র প্রতিক্রিয়া সৃষ্টি হয়৷ ইয়াৰ পাছত ৪৯খন তৈলক্ষেত্র অ’ এন জি চিক নিজৰ লগত ৰাখিবলৈ অনুমতি দিয়া হয় যদিও তিনি বছৰ প্রতিষ্ঠানটোৰ পাৰদর্শিতা চৰকাৰৰ নিৰীক্ষণত ৰখাৰ চর্ত আৰোপ কৰা হয়৷ তিনি বছৰ অতিক্রম নৌকৰোঁতেই কেন্দ্রীয় চৰকাৰে তৈলক্ষেত্র ব্যক্তিগতকৰণৰ বাবে তৃতীয়টো প্রচেষ্টা হাতত লৈছে৷

অৱশ্যে কেন্দ্রীয় চৰকাৰে ইয়াৰ কাৰণ হিচাপে যুক্তি আগবঢ়াইছে যে খাৰুৱা তেল আৰু প্রাকৃতিক গেছৰ আমদানিৰ ক্ষেত্রত বিদেশী ৰাষ্ট্রৰ ওপৰত নির্ভৰশীলতা কমাবৰ বাবে ব্যক্তিগতকৰণৰ সিদ্ধান্ত লোৱা হৈছে৷ ২০২৩–২৪ বর্ষৰ ভিতৰত ৪০ মিলিয়ন টন খাৰুৱা তেল আৰু ৫০ মিলিয়ন কিউবিক মিটাৰ প্রাকৃতিক গেছ ঘৰুৱাভাৱে উৎপাদনৰ লক্ষ্য লোৱা হৈছে৷ ইয়াৰে এক বৃহৎ অংশৰ উৎপাদন অ’ এন জি চিৰ পৰা আশা কৰা হৈছে৷ উল্লেখ্য যে ২০২০–২১ বর্ষত অ’ এন জি চিয়ে ২০.২ মিলিয়ন টন খাৰুৱা তেল উৎপাদন কৰিছিল৷ যিটো আছিল ২০১৮–১৯ বর্ষতকৈ ০.৪ মিলিয়ন টন কম৷ একেদৰে অ’ এন জি চিয়ে ২০১৮–১৯ বর্ষত ২৪.৬৭ বিলিয়ন কিউবিক মিটাৰ প্রাকৃতিক গেছ উৎপাদন কৰাৰ বিপৰীতে ২০২০–২১ বর্ষত ২১.৮৭ বিলিয়ন কিউবিক মিটাৰ গেছহে উৎপাদন কৰিবলৈ সক্ষম হয়৷ অ’ এন জি চিৰ উৎপাদন হ্রাস পোৱাটোকে কেন্দ্রীয় চৰকাৰে তৈলক্ষেত্র বিক্রীৰ অজুহাত হিচাপে দেখুৱাইছে৷