নিয়মীয়া বাৰ্তা, ১০ মেঃ ৰাজ্যৰ চাহ বাগিচাসমূহত ক’ভিড ভেকচিন প্রদানৰ বিশেষ কেম্প তৎকালীনভাৱে স্থাপন কৰিবলৈ আহ্বান জনাইছে নর্থ ইষ্টার্ন টি এছ’চিয়েচন (নেটা)ই৷ এক বিবৃতিত নেটাৰ উপদেষ্টা বিদ্যানন্দ বৰকটকীয়ে কয় যে ক’ভিডৰ দ্বিতীয় লহৰৰ পৰা চাহ বাগিচাসমূহক বচাবলৈ শীঘ্রে শ্রমিকসকলক ভেকচিন প্রদান কৰা উচিত৷
ইতিমধ্যে স্বাস্থ্য আৰু পৰিয়াল কল্যাণ বিভাগৰ প্রধান সচিব সমীৰ কুমাৰ সিন্হাৰ লগতে সকলো জিলা উপায়ুক্তলৈ নেটাই পত্র প্রেৰণ কৰিছে৷ ভেকচিন প্রদানৰ ক্ষেত্রত ৰাজ্য চৰকাৰক সকলো ধৰণৰ সহযোগিতা আগবঢ়োৱা হ’ব বুলিও বৰকটকীয়ে উল্লেখ কৰিছে৷ উল্লেখ্য যে ইতিমধ্যে কেইবাখনো চাহ বাগিচাত শতাধিক শ্রমিক–কর্মচাৰী ক’ভিডত আক্রান্ত হৈছে৷