নলবাৰীত মৎস্য পালনৰ কিটিপ লৈ মৰাণলৈ কণ্ঠশিল্পী বিপিন চাউদাং

নিয়মীয়া বাৰ্তা ২৯ জুনঃ ক’ৰোনাই সাংস্কৃতিক জগতখনলৈ নমাই অনা বিপর্যয়ৰ বাবে বহুতো শিল্পীয়ে জীয়াই থকাৰ বিভিন্ন পন্থা অৱলম্বন কৰা দেখা গৈছে৷ তেনে এগৰাকী হ’ল জনপ্রিয় কণ্ঠশিল্পী বিপিন চাউদাং৷ শিল্পীগৰাকীয়ে মঞ্চত গীত গোৱাৰ আশা বাদ দি মৎস্য ব্যৱসায়ত নামি পৰিছে৷ তিনিচুকীয়া জিলাৰ মৰাণত তেওঁ নিজে বৃহৎ পুখুৰী খন্দাই তাত মাছ উৎপাদন কৰি ব্যৱসায় কৰাৰ পদক্ষেপ গ্রহণ কৰিছে৷ এই লৈ শিল্পীগৰাকীয়ে পত্নীক লগত লৈ মৰাণৰ পৰা আহিল নলবাৰী জিলাৰ তথা উত্তৰ–পূর্বাঞ্চলৰ বিশিষ্ট মৎস্য ব্যৱসায়ী দেৱজিৎ বর্মনৰ গাঁও নানকাৰভয়ৰাত থকা বৃহৎ মীন পামখনলৈ৷ বিশিষ্ট মৎস্য ব্যৱসায়ী দেৱজিৎ বর্মনৰ লগত মাছ উৎপাদনৰ বিভিন্ন কাৰিকৰী দিশৰ বিষয়ে আলোচনা কৰি ছয় কুইণ্টলতকৈ অধিক বিভিন্ন প্রজাতিৰ মাছৰ পোনা দুখন ট্ৰাকত  লৈ যায়৷

নলবাৰীৰ বিশিষ্ট সাংবাদিক ব্রজেন তালুকদাৰৰ লগত মত বিনিময় কৰি জনপ্রিয় কণ্ঠশিল্পী বিপিন চাউদাঙে কয় যে ক’ভিড মহামাৰীৰ বাবে এতিয়া মঞ্চত গীত গাবলৈ বহুত অসুবিধা হৈছে৷ কেতিয়া ভাল দিন আহে ভাবিব নোৱাৰি৷ গতিকে মৎস্য পালন কৰি তাৰ পৰা এটা ভাল ব্যৱসায় হ’ব বুলি আশা কৰিয়ে মই মৰাণত বৃহৎ পুখুৰী খন্দাইছেছা৷ নামনি অসমৰ পৰা উজনিলৈ মৎস্য ব্যৱসায়ৰ জৰিয়তে ৰাজ্যত অর্থনৈতিক বিকাশৰ চিন্তা–চর্চা কৰিছেছা৷ এই লৈ উত্তৰ–পূর্বাঞ্চলৰ বিশিষ্ট মৎস্য ব্যৱসায়ী দেৱজিৎ বর্মনৰ লগত মৎস্য ব্যৱসায়ৰ বিভিন্ন কৌশল আয়ত্ত কৰিবলৈ সক্ষম হ’লোঁ৷

শিল্পীগৰাকীয়ে পুনৰ কয় যে মুখ্যমন্ত্রী ড০ হিমন্ত বিশ্ব শর্মাৰ নেতৃত্বত ৰাজ্যখনে উন্নতিৰ শিখৰত উপনীত হ’ব পাৰিব বুলি মই বিশ্বাস কৰোঁ৷ তাৰ বাবে আমি সকলোৱে সহায়–সহযোগ আগবঢ়াব লাগে৷ মই আলফা, আছু আৰু মুখ্যমন্ত্রীক লৈ এতিয়া এটা নতুন গীত ৰচনা কৰি তাক সুৰ দি আছো৷ ‘‘দেশ যায় যায় যায় বুলি/পৰেশ ককাই/সৌ সিদিনাই এৰি গ’ল ঘৰ পৰেশ ককাই/জাতি মাটি ভেটি ৰাখিবলৈ/ছাত্র সন্থাই/দীর্ঘদিনীয়া সংগ্রামখনি নিছে আগুৱাই/তথাপিতো তোৰ জননী দুখৰ ওৰ পৰা নাই/ এইবাৰ আশা কৰিছে দেশৰ জনতাই/ দেশ গঢ়িব হিমন্ত বিশ্বই/ দেশ বচাব হিমন্ত বিশ্ব শর্মাই’ শীর্ষক গীতটো সম্পূর্ণ হ’লেই ৰাইজৰ মাজত প্রচাৰ কৰিম৷ বিশিষ্ট মৎস্য ব্যৱসায়ী দেৱজিৎ বর্মনে শিল্পীগৰাকীক এখন ফুলাম গামোচাৰে অভিনন্দন জনায়৷ কণ্ঠশিল্পীগৰাকীক সংগ দিয়ে সদৌ নলবাৰী জিলা ছাত্র সন্থাৰ সাধাৰণ সম্পাদক অক্ষয় ডেকাই৷