নিয়মীয়া বাৰ্তা, ১৮ আগষ্টঃ দেশৰ দ্বিতীয় সর্ববৃহৎ ৰাজহুৱা খণ্ডৰ বেংক পঞ্জাৱ নেচনেল বেংকে আজি মুখ্যমন্ত্রী ড০ হিমন্ত বিশ্ব শর্মাৰ হাতত ১.৬২ কোটি টকাৰ চেকপ্রদান কৰে৷ জনতা ভৱনত অনুষ্ঠিত এক অনুষ্টানত বেংকৰ গুৱাহাটী মণ্ডল (উত্তৰ পূর্বাঞ্চল)ৰ মূৰব্বী তথা মহা প্রৱন্ধক এছ এছ সিঙে মুখ্যমন্ত্রীক চেকখন প্রদান কৰে৷ এই অনুষটানত নিৰেন্দ্র কুমাৰ, ৰাজেন্দ্র সিঙকে ধৰি বেংকৰ বহুকেইগৰাকী বিষয়া আৰু জনস্বাস্থ্য কাৰিকৰী তথা তথ্য প্রযুক্তি বিভাগৰ আয়ুক্ত সচিব সিদ্ধার্থ সিং উপস্থিত থাকে৷
পঞ্জাৱ নেচনেল বেংকে প্রদান কৰা এই ধনেৰে ৰাজ্যৰ ১৬ খন জিলাৰ চিকিৎসা সঁজুলি ক্রয় কৰা হ’ব৷ হিতাধিকাৰী জিলাসমূহত পঞ্জাৱ নেচনেল বেংক সেৱাৰ ক্ষেত্রত শীর্ষ স্থানত আছে৷ ৰাষ্ট্রীয় স্বাস্থ্য অভিযান, অসমৰ সৈতে হোৱা এক আলোচনাৰ অন্তত বেংকটোৱে এই সকল্পৰ ৰূপায়ণৰ বিষয়ে চিন্তা–চর্চা কৰে৷ চেক গ্রহণ কৰি এই মহান পদক্ষেপৰ বাবে বেংক কর্তৃপক্ষক কৃতজ্ঞতা জ্ঞাপন কৰে মুখ্যমন্ত্রী ড০ শর্মাই৷
ইফালে, মাণ্ডলিক মূৰব্বী সিঙে ৰাজ্যবাসীৰ অর্থনৈতিক উন্নয়ন আৰু সামগ্রীক বিকাশৰ বাবে ৰাজ্য চৰকাৰক আগন্তুক সময়ত পূর্ণ সহযোগিতা আগবঢ়াব বুলি আশা প্রদান কৰে৷