নিয়মীয়া বাৰ্তা,২৭চেপ্টেম্বৰ:-সমগ্ৰ ৰাজ্যজুৰি ড্ৰাগচ, ব্ৰাউন ছুগাৰ সৰবৰাহকাৰীৰ বিৰুদ্ধে আৰক্ষীৰ তীব্ৰ অভিযান অব্যাহত থকাৰ সন্ধিক্ষণত আজি কলগাছিয়া আৰক্ষী থানাৰ ভাৰপ্ৰাপ্ত বিষয়া সঞ্জয় কুমাৰ লস্কৰৰ নেতৃত্বত যোৱা আৰক্ষীৰ এটা সজাতী দলে কলগাছিয়াস্ত আল-আমিন একাডেমীৰ নিচেই কাষতে থকা দলংৰ ওপৰৰ পৰা ব্ৰাউন ছুগাৰ সহ দুজন যুৱকক গ্ৰেপ্তাৰ কৰিবলৈ সক্ষম হয়।
আৰক্ষীয়ে এক গোপন সূত্ৰৰ ভিত্তিত সৰভোগৰ পৰা কলগাছিয়া পিনে আহি থকা অৱস্থাত এখনAS-15N O772 নম্বৰৰ বাইকসহ কলগাছিয়া আৰক্ষী থানাৰ অন্তৰ্গত খৰিচালা গাঁৱৰ গিয়াচ উদ্দিন আৰু টাপাজুলি গাঁৱৰ জিয়াৰুল হক নামৰ যুৱক দুজনক আটক কৰে।ধৃত যুৱক দুজনৰ পৰা এটা চাবোনৰ বাকচ ভৰ্তি ব্ৰাউন ছুগাৰ আৰু তিনিখন মোবাইল উদ্ধাৰ কৰে আৰক্ষীয়ে। উদ্ধাৰ কৰা ব্ৰাউন ছুগাৰ খিনিৰ বজাৰ মূল্য ৩০/৩৫হাজাৰ টকা হ’ব বুলি জানিব পৰা গৈছে।