নিয়মীয়া বাৰ্তা, ২৮ ছেপ্টেম্বৰঃ ডিটিঅ’ অফিচত হোৱা ভিৰ আৰু দীঘলীয়া শাৰীৰ বাবে আজিলৈকে নিজৰ ড্রাইভিং লাইচেঞ্চখনেই ৰিনিউ কৰিব পৰা নাই মুখ্যমন্ত্রী ড০ হিমন্ত বিশ্ব শর্মাই৷
মুখ্যমন্ত্রী ড০ শর্মাই সোমবাৰে নিজেই এই কথা প্রকাশ কৰি কয় যে ড্রাইভিং লাইচেঞ্চখন ৰিনিউ কৰিব লাগিলে ডিটিঅ’ অফিচত যাব লাগে৷ ডিটিঅ’ অফিচত যথেষ্ট ভিৰ, দীঘলীয়া শাৰী পাতিব লাগে৷ সেই ভিৰত দীঘলীয়া শাৰী পাতিবলৈ তেওঁৰ সময় নাই বাবেই আজিলৈকে লাইচেঞ্চখন ৰিনিউ কৰিব পৰা নাই৷ তদুপৰি লাইচেঞ্চখনত তেওঁৰ ব্লাড গ্রুপো ভুলকৈ উল্লেখ আছে৷ তেওঁৰ ব্লাড গ্রুপ হ’ব লাগে অ’৷ কিন্তু হৈ আছে এ৷
সেয়ে আজিলৈকে তেওঁ ড্রাইভিং লাইচেঞ্চখন ৰিনিউ কৰিব পৰা নাই৷ এই প্রসংগতে তেওঁ কয় যে ব্যস্ত মানুহৰ ডিটিঅ’ অফিচত হোৱা ভিৰ আৰু দীঘলীয়া শাৰীৰ বাবেই বহু সময়ত ড্রাইভিং লাইচেঞ্চ ৰিনিউ কৰাৰ ক্ষেত্রত অনীহা থাকে৷ সেইদৰে ক্ষমতাত থকা মানুহে তেওঁলোকক কোনেও নধৰে বুলি ভাবিয়েই ৰিনিউ কৰিব নাযায়৷ এনে পৰিস্থিতিৰ পৰিপ্রেক্ষিতত মুখ্যমন্ত্রী ড০ শর্মাই অনলাইনযোগে ড্রাইভিং লাইচেঞ্চ ৰিনিউ আৰু ডুপ্লিকেট ড্রাইভিং লাইচেঞ্চ প্রদানৰ ব্যৱস্থা আসন্ন দুর্গাপূজাৰ আগতে কৰাৰ ঘোষণা কৰে৷