নিয়মীয়া বাৰ্তা, ২৪ নৱেম্বৰঃ এখন যাত্ৰীবাহী এক্সপ্ৰেছত মানব সৰবৰাহকাৰীৰ কবলৰ পৰা দুগৰাকী যুৱতী উদ্ধাৰ কৰা হয় । নলবাৰী ষ্টেচনত টহলদাৰী আৰপিএফে অভিযান চলাই মানৱ সৰবৰাহকাৰীৰ কবলৰ পৰা যুৱতী দুগৰাকীক উদ্ধাৰ কৰে । লগতে মানৱ সৰবৰাহত জড়িত থকাৰ সন্দেহত এজনী মহিলা আৰু এজন যুৱকক আটক কৰে । উদ্ধাৰ হোৱা দুই যুৱতীৰ ঘৰ দৰং জিলাৰ অন্তৰ্গত দলগাঁৱত ।
ধৃত সন্দেহযুক্ত সৰবৰাহকাৰী দুজন হৈছে ঝাৰখণ্ডৰ পুপাকুৰৰ আচগৰ আনচাৰী আৰু দৰং জিলাৰ বেচিমাৰীৰ চুফিয়া আনচাৰী । সৰবৰাহকাৰী দুজনে যুৱতী দুগৰাকীক কেৰালাৰ কোম্পানী এটাত কাম দিয়াৰ প্ৰলোভনেৰে নিবলৈ ওলোৱা মুহূৰ্তত গুৱাহাটী-তাম্বুৰাম এক্সপ্ৰেছত আৰপিএফে অভিযান চলাই উদ্ধাৰ কৰে । পিছত সৰবৰাহকাৰীসহ উদ্ধাৰ কৰা আটাইকেইজনক ৰঙিয়াৰ জিআৰপি থানাত চমজাই দিয়ে ।
উল্লেখ্য যে দৰিদ্ৰতাৰ সুযোগলৈ এচাম পৰিয়ালৰ কিশোৰী-যুৱতীক মানৱ সৰবৰাহকাৰী চক্ৰই এনেদৰে বহিঃৰাজ্যত বিক্ৰী কৰি আহিছে ।
প্ৰেৰকঃ ফাৰুক হুছেইন , ৰঙিয়া