নিয়মীয়া বাৰ্তা, ৫ ডিচেম্বৰঃ গোৱালপাৰা জিলাৰ ৰংজুলি আৰক্ষী থানৰ অন্তৰ্গত টিপলাইত আজি টিপলাই সচেতন মহিলা মঞ্চই প্ৰায় ১০০ লিটাৰ চুলাই মদ জব্দ কৰে । উল্লেখ্যযে টিপলাই অঞ্চলৰ দৈনিক বজাৰ, সাপ্তাহিক বজাৰত দীৰ্ঘদিনৰে পৰা একাংশ লোকে লুকাচুৰিকৈ চুলাই মদ বিক্ৰী কৰি থকাৰ তথ্য লাভ কৰে সচেতন মহিলা মঞ্চৰ মহিলা সকলে । আজি টিপলাই সাপ্তাহিক বজাৰত সচেতন মহিলা মঞ্চৰ একাংশ মহিলা বজাৰখনত উপস্থিত হৈ বজাৰখনৰ আওহতীয়া ঠাইত বিক্ৰীৰ বাবে অহা বহুকেইগৰাকী চুলাই ব্যৱসায়ীৰ পৰা প্ৰায় ১০০ লিটাৰ চুলাই মদ জব্দ কৰি নষ্ট কৰে। অৱশ্যে মহিলা সকলে কোনো এজন চুলাই ব্যৱসায়ীকে চিনাক্ত কৰিবলৈ সক্ষম নহল। মহিলা সকলৰ এই কাৰ্যৰ সচেতন মহলে প্ৰশংসা কৰাৰ লগতে অনাগত সময়ত বৃহত্তৰ অঞ্চলটোত চলি থকা অসামাজিক কাৰ্য বন্ধ কৰাৰ বাবে পদক্ষেপ গ্ৰহণ কৰিবলৈ আহ্বান জনায়।
প্ৰেৰক: জ্যোতিষ নাথ, টিপলাই