নিয়মীয়া বাৰ্তা, ২২ ডিচেম্বৰঃ পাকিস্তানৰ তাৰকা লেগ স্পিনাৰ য়াছিৰ শ্বাহ আৰু তেওঁৰ এগৰাকী বন্ধুৰ বিৰুদ্ধে ধর্ষণৰ অভিযোগ উত্থাপিত হৈছে৷ লাহোৰৰ ছালিমাৰ আৰক্ষী চকীত দাখিল হোৱা অভিযোগ অনুসৰি পাকিস্তানৰ ক্রিকেটাৰগৰাকীয়ে এগৰাকী নাবালিকাক ধর্ষণৰ ক্ষেত্রত বন্ধুক সহযোগ কৰিছিল৷ ধর্ষণৰ পিছত নাবালিকাগৰাকীক মুখ নুখুলিবলৈ লেগ স্পিনাৰ য়াছিৰ শ্বাহে ভাবুকি দিছিল আৰু ইয়াৰ বিনিময়ত তেওঁক এটা বিলাসী ফ্লেট উপহাৰ হিচাপে দিয়াৰ প্রস্তাৱ আগবঢ়ায় বুলি নাবালিকাগৰাকীয়ে আৰক্ষীক অভিযোগ দাখিল কৰিছে৷ আৰক্ষীৰ আগত তেওঁ আন এক অভিযোগ দাখিল কৰে যে য়াছিৰ শ্বাহে সমগ্র ঘটনাৰ ভিডি’ নিজৰ ম’বাইলত বন্দী কৰি ৰাখিছে আৰু আৰক্ষীৰ ওচৰ চাপিলে ভিডিঅ’সমূহ ৰাজহুৱা কৰি দিয়াৰ ভাবুকি দিছে৷ উল্লেখ্য যে আঙুলিৰ আঘাতৰ বাবে শেহতীয়াকৈ পাকিস্তানৰ তাৰকা লেগ স্পিনাৰগৰাকীয়ে টেষ্ট শৃংখলাৰ বাবে বাংলাদেশ ভ্রমণ কৰা নাছিল৷