নিয়মীয়া বাৰ্তা, ১৬ মাৰ্চঃ বিশ্বত ত্ৰাস সৃষ্টি কৰা ক’ৰোনাক লৈ এতিয়া সকলো ধৰণৰ ব্যৱস্থা গঢ়ি তুলিছে ৰাজ্য চৰকাৰে । বৰ্তমানলৈকে অসমত এজনো লোকৰ দেহত এই ভাইৰাছ লাভ কৰা নাই বুলি উল্লেখ কৰে স্বাস্থ্যমন্ত্ৰী হিমন্ত বিশ্ব শৰ্মাই ।
সোমবাৰে এক সংবাদমেল সম্বোধন কৰি স্বাস্থ্যমন্ত্ৰী ড০ হিমন্ত বিশ্ব শৰ্মাই উল্লেখ কৰে যে তিনিটাকৈ ক’ৰোনা পৰীক্ষা কেন্দ্ৰ স্থাপন কৰা হৈছে অসমত ।
‘পূৰ্বে , ক’ৰোনা ভাইৰাছৰ পৰীক্ষা কেৱল গুৱাহাটী চিকিৎসা মহাবিদ্যালয় হাস্পতাল আৰু আঞ্চলিক চিকিৎসা গৱেষণা কেন্দ্ৰ ডিব্ৰুগড়ত সম্পন্ন হৈছিল । কিন্তু আজি যোৰহাট চিকিৎসা মহাবিদ্যালয় হাস্পতালৰ পৰীক্ষাগাৰকো ক’ৰোনা ভাইৰাছ পৰীক্ষাৰ বাবে স্বীকৃতি প্ৰদান কৰা হৈছে ।’ – এইদৰে উল্লেখ কৰে মন্ত্ৰীগৰাকীয়ে ।
স্বাস্থ্যমন্ত্ৰীগৰাকীয়ে লগতে উল্লেখ কৰে যে, নমুনা সংগ্ৰহৰ বাবেও তিনিটাকৈ কেন্দ্ৰ গঢ়ি তোলা হৈছে অসমত । বৰপেটাৰ ফকৰুদ্দিন আলী আহমেদ চিকিৎসা মহাবিদ্যালয় হাস্পতাল , তেজপুৰ চিকিৎসা মহাবিদ্যালয় হাস্পতাল আৰু শিলচৰ চিকিৎসা মহাবিদ্যালয় হাস্পতালত গঢ়ি তোলা হৈছে নমুন সংগ্ৰহ কেন্দ্ৰ ।