নিয়মীয়া বাৰ্তা, ৩ এপ্ৰিলঃ অসমৰ মাটিত থাকি, বায়ু–পানী সেৱন কৰি অসমীয়া ভাষাকেই তাচ্ছিল্য কৰিবলৈ গৈ ৰাজ্যবাসীৰ ৰোষত পৰা এ আই ইউ ডি এফৰ মুৰব্বী বদৰুদ্দিন আজমলৰ ভাতৃ তথা যমুনামুখৰ বিধায়ক চিৰাজুদ্দিন আজমলে অৱশেষত শিৰ নত কৰিবলৈ বাধ্য হ’ল৷ অসমীয়াৰ স্বাভিমানত আঘাত হানিবলৈ মৰসাহ কৰা চিৰাজুদ্দিন আজমলে নিজৰ ভুলৰ বাবে অসমবাসীৰ ওচৰত ক্ষমা ভিক্ষা বিচাৰিলে৷ অসম বিধানসভা সচিবালয় চৌহদত নিজকে ইণ্টাৰনেচনেল মানুহ বুলি জহাই অসমীয়া ভাষাক চৰম অপমান কৰা আগৰ ব্যৱসায়ী পৰিয়ালৰ অন্যতম সদস্য চিৰাজুদ্দিন আজমলে এক ভিডিঅ’যোগে সুৰ সলাই এনে কার্য ইচ্ছাকৃতভাৱে কৰা নাই বুলি মন্তব্য কৰে৷
অসমীয়াৰ পৰিৱর্তে পুনৰ ইংৰাজী ভাষাতে তেওঁ অসমবাসীৰ উদ্দেশ্যি কয়– ‘মোৰ এক বক্তব্যক লৈ বহু লোকে মোৰ বিৰুদ্ধে অভিযোগ উত্থাপন কৰিছে৷ মই অসমীয়া ভাষাক ভাল পাওঁ আৰু ভাষাটো শিকি আছোঁ৷ সলসলীয়াকৈ অসমীয়া ভাষা কোৱাৰ বাবে মোক কিছু সময়ৰ প্রয়োজন হ’ব৷ বহু লোকে একে সময়তে কেইবাটাও ভাষাত বাকপটু হ’ব নোৱাৰে৷ যি নহওক, বিধায়ক হৈ থকাৰ সময়তে মই অসমীয়া ভাষা সলসলীয়াকৈ ক’বলৈ শিকিম বুলি প্রতিশ্রুতি দিলোঁ৷ মই ইচ্ছাকৃতভাৱে তেনে ধৰণৰ কথা কোৱা নাছিলোঁ৷ মই কেতিয়াও অসমীয়া ভাষা আৰু অসমৰ জনসাধাৰণক তাচ্ছিল্য কৰাৰ চেষ্টা কৰা নাই৷ কিন্তু মই অসমীয়া ভাষাক তাচ্ছিল্য কৰাৰ কথা বহু লোকে অনুভৱ কৰাৰ বিষয়টো মোক দৃষ্টিগোচৰ কৰোৱা হৈছে৷ জানিয়েই হওক বা অজানিতে হওক, মই এতিয়ালৈকে এনে কাম কৰা নাই৷ সেয়েহে মই মোৰ মন্তব্যৰ বাবে অন্তৰৰ পৰা প্রতিজন অসমীয়া ভাই–ভনী আৰু বন্ধুৰ ওচৰত ক্ষমা বিচাৰিছোঁ৷ মোৰ এই ভুল সম্পূর্ণ অনিচ্ছাকৃত৷’
মন কৰিবলগীয়া যে এই ভিডিঅ’টোৰ পূর্বে যমুনামুখৰ এ আই ইউ ডি এফৰ বিধায়কজনে ৰাজ্যজুৰি তীব্র বিতর্কৰ সৃষ্টি হোৱা বিষয়টোক লৈ ফেচবুকযোগে এক পোষ্টও প্রেৰণ কৰিছিল৷ য’ত তেওঁ একাংশ সংবাদ মাধ্যম আৰু বুদ্ধিজীৱীকহে দোষাৰোপ কৰাৰ চেষ্টা কৰে৷ ফেচবুক পোষ্টটোত বিধায়ক চিৰাজুদ্দিন আজমলৰ ভাষ্য আছিল এনে ধৰণৰ– ‘অসমীয়া ভাষা সন্দর্ভত মোৰ এটা বক্তব্যক একাংশ সংবাদ গোষ্ঠী আৰু তথাকথিত কিছু বুদ্ধিজীৱীয়ে বিকৃত কৰা দেখি মোৰ বেয়া লাগিছে৷ যিহেতু বিষয়টো ৰাষ্ট্রীয় ৰাজনীতিৰ সৈতে জড়িত, সেয়ে মই ইংৰাজীতে ক’ব বিচাৰিছিলোঁ৷ এনেই মই প্রথম ব্যক্তি নহয়, যিয়ে সাংবাদিকৰ প্রশ্ণৰ ইংৰাজীত উত্তৰ দিছিলোঁ৷ যদি কোনোবাই চাব বিচাৰে মই আৰু মোৰ পৰিয়ালে অসমীয়া ভাষাৰ কাৰণে কি কৰি আছোঁ, তেন্তে এবাৰ হোজাইলৈ আহক৷ মই অসম সাহিত্য সভাৰ আজীৱন সদস্য৷ আজমল ফাউণ্ডেচনে অসমীয়া ভাষা আৰু সংস্কৃতিৰ বিকাশৰ বাবে বিভিন্ন পদক্ষেপ লৈছে৷ অসমীয়া ভাষা নজনা লোকক অসমীয়া শিকাবলৈ আজমল ফাউণ্ডেচনে অহৰহ প্রচেষ্টা চলাই গৈছে৷ আমি বিশ্বৰ বহু প্রসিদ্ধ বিভিন্ন ভাষাৰ কিতাপ অসমীয়ালৈ অনুবাদ কৰাইছোঁ৷ আৰু বহুতো আছে৷ একেটা বক্তব্যত মই এই কথাও কৈছোঁ যে মই এজন অসমীয়া আৰু অসমক মই ভাল পাওঁ৷ অনুগ্রহ কৰি তিলটোক তাল কৰাৰ পূর্বে মোৰ বক্তব্যটো ভালকৈ চাওক৷ জয় আই অসম৷’
উল্লেখ্য যে সদ্যসমাপ্ত ৰাজ্যসভা নির্বাচন সন্দর্ভত অসম বিধানসভা সচিবালয় চৌহদত এ আই ইউ ডি এফৰ বিধায়কজনৰ অসমীয়া ভাষাত প্রতিক্রিয়া বিচাৰিছিল সংবাদ মাধ্যমে৷ সাংবাদিকৰ প্রশ্ণৰ উত্তৰ দিবলৈ গৈ বিধায়ক চিৰাজুদ্দিন আজমলে চূড়ান্ত ঔদ্ধতালিৰে অসমীয়া ভাষাক অপমান কৰি কয়– ‘মই অসমীয়া নকওঁ৷ আমি ইণ্টাৰনেচনেল মানুহ৷ অসমীয়া ক’ব নাজানো৷ অসমত অসমীয়া কোৱা কিমান লোক আছে? ইংৰাজীত নক’লে অসমীয়া বুজি নাপায়৷’ স্পর্ধাৰ সকলো সীমা অতিক্রম কৰি এ আই ইউ ডি এফৰ মুৰব্বী বদৰুদ্দিন আজমলৰ ভাতৃ বিধায়ক চিৰাজুদ্দিন আজমলে কৰা এনে মন্তব্যৰ পাছতে ৰাজ্যজুৰি সৃষ্টি হয় তীব্র প্রতিক্রিয়া৷ তাৰ পাছতে ফেচবুকযোগে প্রথমতে সংবাদ মাধ্যম আৰু বুদ্ধিজীৱীক দোষ জাপি দিব বিচৰাৰ চেষ্টা কৰা আৰু পৰৱর্তী সময়ত ক্ষমা ভিক্ষা বিচৰা এইজন জনপ্রতিনিধিৰ কর্মকাণ্ডই হতচকিত কৰিছে প্রতিজন অসমীয়াক৷