নিয়মীয়া বাৰ্তা, ১০ জানুৱাৰীঃ আজিৰে পৰা গুৱাহাটীত আৰম্ভ হ’ব তৃতীয় সংস্কৰণৰ ‘খেলো ইণ্ডিয়া য়ুথ গেমছ’৷ দেশৰ সহস্রাধিক উদীয়মান খেলুৱৈৰ ক্রীড়া প্রতিভা উদ্ভাসিত হ’ব এই ‘খেলো ইণ্ডিয়া য়ুথ গেমছ’ত ।
আজি সন্ধিয়া সৰুসজাই ষ্টেডিয়ামত অনুষ্ঠিত হ’বলগীয়া জাকজমকতাপূর্ণ উদ্বোধনী অনুষ্ঠানৰ বাবে সম্পূর্ণৰূপে সাজু হৈ উঠিছে অসম চৰকাৰ আৰু ভাৰতীয় ক্রীড়া প্রাধিকৰণ (ছাই)৷ অনুষ্ঠানটো আকর্ষণীয় আৰু স্মৰণীয় কৰি তুলিবলৈ সৰুসজাই ষ্টেডিয়ামত প্রায় ৪০০গৰাকী কলা–কুশলী আৰু কাৰিকৰী বিভাগৰ কর্মী যোৱা কিছুদিন ধৰি দিনে–নিশাই ব্যস্ত হৈ আছে৷ ৰং–বিৰঙী পোহৰ আৰু অত্যাধুনিক প্রযুক্তিৰ অভিনৱ সমাহাৰেৰে উদ্বোধনী অনুষ্ঠানক চিত্তাকর্ষক কৰি তুলিবলৈ তেওঁলোকে কালি সন্ধিয়া অন্তিম আখৰা চলায়৷
মন কৰিবলগীয়া যে তৃতীয় সংস্কৰণৰ ‘খেলো ইণ্ডিয়া য়ুথ গেমছ’ৰ উদ্বোধনী অনুষ্ঠানত পোহৰ আৰু প্রযুক্তিৰ অভিনৱ সমাহাৰ ঘটাৰ সমান্তৰালকৈ অসমৰ বাৰেৰহণীয়া সংস্কৃতি আৰু মনোমোহা প্রাকৃতিক সৌন্দর্যৰ ছবি উদ্ভাসিত হ’ব৷
ৰাজ্যৰ বিভিন্ন জাতি–জনগোষ্ঠীৰ পৰম্পৰাগত নৃত্য–গীতেও উদ্বোধনী অনুষ্ঠানক আকর্ষণীয় কৰি তুলিব৷ ইফালে খেলো ইণ্ডিয়াৰ জৰিয়তে দেশৰ যুৱ প্রজন্মৰ মাজত ক্রীড়াৰ পৰিৱেশ সৃষ্টিৰ সমান্তৰালকৈ কেন্দ্রীয় চৰকাৰে প্রতিযোগিতাখনৰ মাধ্যমেৰে পৰিৱেশ সংৰক্ষণৰো বিশেষ ব্যৱস্থা গ্রহণ কৰিছে৷ এই অনুসৰি খেলো ইণ্ডিয়াৰ মেচ অনুষ্ঠিত হ’বলগীয়া গুৱাহাটীৰ ৪টা স্থানত খেলুৱৈৰ অহা–যোৱাৰ বাবে বৈদ্যুতিক বাহনৰ ব্যৱহাৰ কৰা হ’ব৷ খেলো ইণ্ডিয়াত এইধৰণৰ প্রযুক্তি ব্যৱহাৰ কৰা গুৱাহাটী হ’ব প্রথমখন মহানগৰ৷