নিয়মীয়া বাৰ্তা, ৭ ফেব্ৰুৱাৰী — আজি পুৱতি নিশা তৈলনগৰী দুলীয়াজানত ভয়ংকৰ পথ দুৰ্ঘটনা সংঘটিত হয় । চহৰখনৰ ১৬ নং তিনিআলিত সংঘটিত এই দূৰ্ঘটনাৰ ফলত এজন যুৱক থিতাতে নিহত হোৱাৰ লগতে গুৰুতৰ ভাৱে আহত আন এজনক অইল মেডিকেলত ভৰ্তি কৰোৱা হয় । নিহত যুৱকজন দুলীয়াজানৰ মৈত্ৰী নগৰ পথৰ মৃন্ময় গগৈ আৰু আহত যুৱকজন অইল কলনীৰ এ-টাইপৰ নিবাসী মানৱ গগৈ বুলি জানিব পৰা গৈছে । ঘটনাৰ প্ৰাপ্ত খৱৰ অনুসৰি AS 06W-9971 নম্বৰৰ ব্ৰীজা বাহনখনে তীব্ৰ বেগেৰে আহি পথৰ কাষৰ এটা বিদ্যুৎৰ খুটাত প্ৰচণ্ড জোৰেৰে খুন্দিওৱাত এই শোকাবহ দূৰ্ঘটনাটো সংঘটিত হয়। ফলত বাহনখনৰ চালকৰ আসনত বহা যুৱকজনৰ ঘটনাস্হলীতে মৃত্যু হয়। পুৱতি নিশা প্ৰায় ৩ বজাত বাৰ্থডে’ পাৰ্টি কৰি উক্ত যুৱক দুজনে দুলীয়াজানৰ নিজ ঘৰলৈ বুলি আহি থকা অৱস্থাত এই ভয়ংকৰ দুৰ্ঘটনা সংঘটিত হোৱা বুলি স্হানীয় লোকৰ ভাষ্যত প্ৰকাশ । এই দূৰ্ঘটনাত বাহনখনো যথেষ্ট ক্ষতিসাধন হয়। ইতিমধ্যে আৰক্ষীয়ে মৃতদেহটো মৰণোত্তৰ পৰীক্ষাৰ বাবে ডিব্ৰুগড়লৈ প্ৰেৰণ কৰে।
কৃষ্ণা গগৈ