নিয়মীয়া বাৰ্তা, ১৪ ফেব্ৰুৱাৰীঃ টাইম্ছ অৱ ইণ্ডিয়া গ্রুপে আয়োজন কৰা বৰ্ণাঢ্য ফিল্মফেয়াৰ বঁটা প্ৰদান অনুষ্ঠানৰ ৯০ শতাংশ টিকট ক্ৰয় কৰিছে অসমৰ দৰ্শকে । বৃহস্পতিবাৰে এই কথা সদৰী কৰে অসম পৰ্যটন উন্নয়ন নিগমৰ অধ্যক্ষ জয়ন্ত মল্ল বৰুৱাই ।
সংবাদমেলত বৰুৱাই প্রকাশ কৰা অনুসৰি, ইতিমধ্যে বুক মাই শ্ব’ৰ সকলো টিকট বিক্রী হৈছে৷ কেৱল অ’ছাম আছামযোগে বিক্রী কৰা টিকটৰ ক্ষেত্রত কিছুসংখ্যক উচ্চ মূল্যৰ টিকটহে বিক্রী নোহোৱাকৈ আছে৷ ফিল্মফেয়াৰ অনুষ্ঠানৰ পূর্বে এই টিকটসমূহো বিক্রী হ’ব বুলি আশা প্রকাশ কৰি তেওঁ কয়– ‘ফিল্মফেয়াৰক লৈ ৰাইজৰ মাজত ব্যাপক উৎসাহ–উদ্দীপনা আমি দেখিছোঁ৷ বুক মাই শ্ব’ আৰু অ’ছাম আছামযোগে বিক্রী হোৱা টিকটৰ ৯০ শতাংশৰো অধিক অসমৰ দর্শকে ক্রয় কৰিছে৷’
উল্লেখ্য যে প্রথমবাৰৰ বাবে টাইম্ছ অৱ ইণ্ডিয়া গ্রুপে মুম্বাইৰ বাহিৰত অভিজাত ফিল্মফেয়াৰ বঁটা প্রদান অনুষ্ঠান অনুষ্ঠিত কৰিব৷ সন্ধিয়া ৫.৩০ বজাৰ পৰা ১৫ ফেব্রুৱাৰীত গুৱাহাটীৰ সৰুসজাই ক্রীড়া প্রকল্পত অনুষ্ঠিত হ’ব ফিল্মফেয়াৰ৷