২০২০ বর্ষৰ আৰম্ভণিতে অসমীয়া ছবিজগতত পুনৰ এক আলোড়ন সৃষ্টি কৰাৰ লক্ষ্যৰে দৃশ্যগ্রহণ আৰম্ভ হৈছে জনপ্রিয় অভিনেতা ৰবি শর্মাৰ কাহিনী, সংলাপ আৰু অভিনয়েৰে ‘ৰঘুপতি’ নামৰ ছবিখনৰ৷ তৃষ্ণ মোচন পিকচার্ছৰ দ্বাৰা নিবেদিত, নৱপ্রজন্মৰ এগৰাকী প্রতিভাৱান চিত্রনাট্যকাৰ আৰু পৰিচালক সুব্রত কাকতিৰ পৰিচালনাৰে আৰম্ভ হোৱা ছবিখনৰ দৃশ্যগ্রহণ কৰিছে প্রদীপ দৈমাৰীয়ে৷ ছবিখনত অভিনয় কৰিছে ৰবি শর্মা, অৰুণ নাথ, অৰুণ হাজৰিকা, প্রীতিকংগনা, সিদ্ধার্থ শর্মা, ৰাজ শর্মা, মনজিৎ শর্মা, প্রিয়ম পল্লৱী আদিয়ে৷ মনোজ মিশ্রই প্রযোজনা কৰা ছবিখনত মেকআপৰ দায়িত্বত আছে বিজেয়িতা পাটগিৰি, জুৰি কলিতাৰ কষ্টিউম ডিজাইন, সংগীত পৰিচালনা কৰিছে প্রণয় দত্ত আৰু আৰশ্বদ মাছুদ ৰহমানে৷ এৰিয়েল চিনেমাটোগ্রাফী অর্ণৱ হাজৰিকা, সহযোগী পৰিচালক হিচাপে আছে হেমন্ত গগৈ আৰু সহঃপৰিচালক হিচাপে আছে নিতু খনিকৰ আৰু জ্যোতিষ্মান চেতিয়া৷ প্রায় ১.৫ কোটি টকাৰ বৃহৎ বাজেটেৰে চিত্রগ্রহণ চলি থকা ছবিখনৰ লোকেচন অতি মনোমোহা৷ গুৱাহাটী, গোলাঘাট, বঙাইগাঁও আদিৰ উপৰি অসমৰ বাহিৰতো চিত্রগ্রহণ হ’ব লগা ছবিখনৰ নির্মাণ সম্পূর্ণ হ’বলৈ মাত্র ৫০ দিনৰ সময়সীমা নির্ধাৰণ কৰিছে৷ ছবিখনৰ দৃশ্যগ্রহণ চলিছে গোলাঘাটৰ ভিন্ন স্থানত৷ মাঘ বিহুৰ পিছতে গুৱাহাটীৰ বিভিন্ন লোকেচনত ‘ৰঘুপতি’ৰ চিত্রগ্রহণ আৰম্ভ হয়৷ উল্লেখ্য যে কাঞ্চনজংঘা, ৰত্নাকৰৰ সফলতাৰ পিছত পৰিয়ালৰ সকলোৰে উপভোগ্য ‘ৰঘুপতি’কো দর্শকে আদৰি ল’ব বুলি এক সাক্ষাৎকাৰত মন্তব্য কৰিছে অভিনেতা ৰবি শর্মা, পৰিচালক সুব্রত কাকতিয়ে৷