নিয়মীয়া বাৰ্তা,২৩ নৱেম্বৰঃ তেল কোম্পানীসমূহৰ মইমতালিৰ প্ৰতিবাদত অহা ২৫ নৱেম্বৰত বৃহত্তৰ গুৱাহাটীৰ তেল ডিপোসমূহ বন্ধ ৰাখিব নৰ্থ ইষ্ট ইণ্ডিয়া পেট্ৰ’লিয়াম ডীলাৰ এছ’চিয়েচনৰ বৃহত্তৰ গুৱাহাটী শাখাই । শুকুৰবাৰে এক বিবৃতিত সংগঠনটোৰ সভাপতি ৰাজীৱ গোস্বামী, সাধাৰণ সম্পাদক দ্বীজেন চন্দ্ৰ মহন্তই কয় যে, তেল কোম্পানীসমূহে অটোমেচনৰ নামত পেট্ৰ’ল ডিপোসমূহৰ তেলৰ টেংকত কেতবোৰ বৈদ্যুতিক যন্ত্ৰ স্থাপন কৰিছে । অথচ কোম্পানীসমূহৰ ওপৰত কণ্ট্ৰ’লাৰ অৱ এক্সপ্ল’ছিভৰ কোনো অনুমতি নাই । পেট্ৰল ডিপোসমূহত যিকোনো নতুন কাম-কাজ কৰিবৰ বাবে এক্সপ্ল’ছিভৰ ক্লিয়াৰেন্স লোৱাটো বাধ্যতামূলক । জনসাধাৰণৰ জীৱন আৰু সুৰক্ষাৰ বাবেও এয়া অতি জৰুৰী । কিন্তু তেল কোম্পানীসমূহে সম্পূৰ্ণ মইমতালিৰে কোনোধৰণৰ অনুমতি নোহোৱাকৈ টেংকৰ ভিতৰত বৈদ্যুতিক যন্ত্ৰ স্থাপন কৰিছে । যিয়ে সুৰক্ষাৰ প্ৰতি ভাবুকিৰ সৃষ্টি কৰিছে । ইয়াৰ বাহিৰেও তেল কোম্পানীসমূহে বহু বাণিজ্যিক নীতিও উলংঘা কৰিছে । আনকি প্ৰশাসনক অৱগত নকৰাকৈ পেট্ৰল ডিপোসমূহত গোপনে অভিয়ান চলাবলৈ আহে । তেল কোম্পানীৰ মইমতালিৰ প্ৰতিবাদত অহা ২৫ নৱেম্বৰত বৃহত্তৰ গুৱাহাটীৰ তেল ডিপোসমূহ বন্ধৰ আহ্বান জনাইছে নৰ্থ ইষ্ট ইণ্ডিয়া পেট্ৰ’লিয়াম ডীলাৰ্ছ এছ’চিয়েচনৰ বৃহত্তৰ গুৱাহাটী শাখাই ।