নিয়মীয়া বাৰ্তা ডিজিটেল, ৫ এপ্ৰিলঃ নিশাটোৰ ভিতৰতে কোটিপতি হোৱাৰ অলীক স্বপ্ন দেখুৱাই ৰাজ্যৰ বিভিন্ন প্রান্তৰ লোকৰ পৰা কোটি কোটি টকা লুণ্ঠন কৰা চুমি বৰা আৰু বিশাল ফুকনৰ বহু নতুন তথ্য সম্প্রতি পোহৰলৈ আহিছে৷ ভুৱা অনলাইন ট্রেডিং কেলেংকাৰিৰ অন্যতম মাষ্টাৰমাইণ্ড তথা ডি বি ষ্টক ব্র’কিঙৰ স্বত্বাধিকাৰী প্রৱঞ্চক দীপাংকৰ বর্মনৰ সৈতেও গোপন সম্পর্ক ৰাখিছিল চুমি–বিশালে৷ সম্প্রতি তিনিওজন অভিযুক্তৰ বিৰুদ্ধে চিবিআয়ে তদন্ত অব্যাহত ৰাখিছে যদিও শেহতীয়াকৈ পোহৰলৈ অহা ভয়ংকৰ তথ্যই হতভম্ব কৰি তুলিছে খোদ তদন্তকাৰী বিষয়াকো৷ বিশেষ সূত্রৰ পৰা জানিব পৰা মতে, এক–দুই নহয়, প্রায় ৪০০ কোটি টকা চুমি–বিশালে ডিবি ষ্টক ব্র’কিঙত বিনিয়োগ কৰিছিল৷ অসমৰ লগতে বিভিন্ন ৰাজ্যৰ বাসিন্দাৰ পৰা বিভিন্ন সময়ত এই ধনখিনি সংগ্রহ কৰিছিল চুমি–বিশালে৷ নিশাটোৰ ভিতৰতে কোটিপতি হোৱাৰ অলীক স্বপ্ণ দেখুৱাই সংগ্রহ কৰা এই ধনেৰেই এক অভিজাত জীৱন যাপন কৰিছিল দুয়োৱে৷ জানিব পৰা মতে, চাৰিটা বছৰত মুঠ ৪০০ কোটি টকা ডিবি ষ্টক ব্র’কিঙত বিনিয়োগ কৰা হৈছিল৷ ইয়াৰ বাদেও ডিব্রুগড়ত বিশাল ফুকনে মুকলি কৰা ‘পার্চেলিয়া’ নামৰ দৰব কোম্পানীটোত প্রায় ৬০ কোটি টকা বিনিয়োগ কৰা হৈছিল৷ ১,৬০০জন লোকৰ ধন কোম্পানীটোত বিনিয়োগ কৰা হৈছিল৷ ডিব্রুগড়ৰ লগতে গুৱাহাটী, তিনিচুকীয়াৰ বহু অভিজাত ব্যৱসায়ী তথা ছত্তিশগড়, ওড়িশা আৰু অৰুণাচল প্রদেশৰ বহু লোক আছিল পার্চেলিয়াৰ বিনিয়োগকাৰীৰ তালিকাত৷ তদন্তৰ স্বার্থত চিবিআয়ে বিনিয়োগকাৰীৰ নাম ৰাজহুৱা কৰা নাই৷ সূত্রটোৱে সদৰী কৰা মতে, চুমি–বিশালে মুঠ ৭জন দালালৰ জৰিয়তে ৰাইজৰ পৰা ধন সংগ্রহ কৰিছিল৷ ৰাজ্যৰ বিভিন্ন প্রান্তৰ মুঠ ২৯৪গৰাকী বিনিয়োগকাৰীৰ পৰা ধন সংগ্রহ কৰিছিল চুমি–বিশাল কোম্পানীয়ে৷ তাৎপর্যপূর্ণভাৱে অতি কৌশলেৰে উক্ত বিনিয়োগকাৰীকেইজনৰ্ পৰা নটাৰীযোগে সংগ্রহ কৰা হৈছিল এই ধনসমূহ৷