বিশেষ বাৰ্তা, ১৩ অক্টোবৰ : আজি তিনিচুকীয়াৰ জানমুখ খেলপথাৰত লখিমপুৰ লোকসভা সমষ্টিৰ সাংসদ প্ৰদান বৰুৱাৰ উপস্থিতিত চৰকাৰী আৰু প্ৰাদেশীকৃত মাধ্যমিক বিদ্যালয়, আদৰ্শ বিদ্যালয় তথা চাহ বাগিচা আদৰ্শ বিদ্যালয়ত নৱম শ্ৰেণীত অধ্যয়নৰত ছাত্ৰ-ছাত্ৰীসকলৰ মাজত মুখ্যমন্ত্ৰী বিশেষ আঁচনিৰ অধীনত চাইকেল প্ৰদান কাৰ্যসূচী অনুষ্ঠিত হয়। মুখ্যমন্ত্ৰী বিশেষ আঁচনিৰ অধীনত তিনিচুকীয়া জিলাৰ ১২৭খন বিদ্যালয়ত চাইকেলপ্ৰাপকৰ মুঠ সংখ্যা হৈছে ১২৭৭০। আজিৰ কাৰ্য্যসূচীত মুখ্য অতিথি সাংসদ প্ৰদান বৰুৱাই তিনিচুকীয়া, চাবুৱা, ডুমডুমা আৰু শদিয়া বিধানসভা সমষ্টিৰ দুগৰাকীকৈ ছাত্ৰ-ছাত্ৰীক আৰু ডিগবৈ তথা মাৰ্ঘেৰিটা বিধানসভা সমষ্টিৰ একোগৰাকীকৈ ছাত্ৰ-ছাত্ৰীক আনুষ্ঠানিকভাবে চাইকেল প্ৰদান কৰে। পৰৱৰ্তী সময়ত পৰ্যায়ক্ৰমে জিলা শিক্ষা বিভাগৰ দ্বাৰা ছাত্ৰ-ছাত্ৰীসকলক চাইকেলসমূহ প্ৰদানৰ ব্যৱস্থা কৰা হ’ব বুলি সদৰী কৰে । বিশেষ অতিথি হিচাপে সাংসদ প্ৰদান বৰুৱাই উল্লেখ কৰে যে এগৰাকী দৰিদ্ৰ পৰিয়ালৰ ছাত্ৰ-ছাত্ৰীৰ এখন চাইকেল অত্যন্ত প্ৰয়োজন ৷ উক্ত কাৰ্য্যসূচীত শদিয়া বিধানসভা সমষ্টিৰ বিধায়ক বলীন চেতিয়া, ডুমডুমা বিধানসভা সমষ্টিৰ বিধায়ক ৰূপেশ গোৱালা, ডিগবৈ বিধানসভা সমষ্টিৰ বিধায়ক সুৰেন ফুকন, তিনিচুকীয়া জিলা আয়ুক্ত স্বপ্নীল পাল, জিলা উন্নয়ন আয়ুক্ত সুশান্ত কুমাৰ দত্ত, তিনিচুকীয়া পৌৰসভাৰ সভাপতি পৱিত্ৰ গগৈ, ডুমডুমা পৌৰসভাৰ পৌৰপতি কান্তা ভট্টাচাৰ্য্য, মাকুম পৌৰসভাৰ পৌৰপতি বিপাশা বৰা, তিনিচুকীয়া উন্নয়ন প্ৰাধিকৰণৰ সভাপতি কাজল গোহাঁই, Assam Hydrocarbon & Energy Company Ltdৰ উপাধ্যক্ষ শিৱজী ডুবে প্ৰমুখ্যে জিলা প্ৰশাসনৰ উচ্চপদস্থ বিষয়াসকল, শিক্ষা বিভাগৰ বিষয়াবৰ্গ, শিক্ষক-শিক্ষয়িত্ৰী আৰু সহস্ৰাধিক ছাত্ৰ-ছাত্ৰী উপস্থিত থাকে ৷
প্ৰেৰক বিবেক বড়া