🔹 নিজমুখে স্বীকাৰ কৰিলে ধৃত হবিয়ালে
নিয়মীয়া বাৰ্তা, ১২ নৱেম্বৰ : নগৰবেৰা আৰক্ষীয়ে সোমবাৰে নিশা এজন যুৱকক চুৰিকাণ্ডৰ সৈতে জড়িত থকাৰ গোচৰত আটক কৰিবলৈ সক্ষম হয় | জানিব পৰা মতে, যুৱকজন ছয়গাঁও চৌধুৰীপাম কালাতলীৰ জৰু মিঞাৰ পুত্ৰ হবিয়াল উদ্দিন। ঘৰ বৰপেটাৰ আলোপতি মাজৰচৰ অঞ্চলত| যুৱকজনে অলপতে নগৰবেৰাৰ পলাহৰটাৰী গান্ধীনগৰ মিলন বজাৰত এখন গহনালয়ত চুৰি কৰি সোণ-ৰূপ লৈ গৈছিল | এজাহাৰৰ ভিত্তিত নগৰবেৰা আৰক্ষীয়ে অনুসন্ধান অব্যাহত ৰখাৰ মাজতে কালি সন্ধিয়া ৩নং উত্তৰ ৰাংগাপানীত এজনৰ তাত চুৰি কৰি নিয়া সোণ-ৰূপখিনি বেচিবলৈ যাওঁতেই গোপন খবৰৰ ভিত্তিত নগৰবেৰা আৰক্ষীয়ে হবিয়াল উদ্দিনক আটক কৰিবলৈ সক্ষম হয় | আনহাতে, হবিয়ালৰ সতে সেই সময়ত একেলগে থকা আন এজন যুৱককো আৰক্ষীয়ে সোধা-পোছাৰ বাবে থানালৈ নিয়ে | ধৃত হবিয়াল উদ্দিনে ইতিমধ্যে নিজমুখে চুৰি কৰাৰ কথা স্বীকাৰো কৰিছে | স্মৰ্তব্য যে আজি কিছুদিনৰ পৰা নগৰবেৰা অঞ্চলত অস্বাভাৱিক হাৰত বাঢ়িছে চুৰিকাণ্ড। তেনেস্থলত এজন ধৰা পৰাৰ পাছত আৰক্ষীয়ে এনে কাণ্ডৰ সৈতে জড়িত চক্ৰক উৎখাত কৰিবলৈ সক্ষম হ’ব বুলি ধাৰণা কৰিছে |
প্ৰেৰক সঞ্জীৱ কুমাৰ দাস