‘বজাৰত লাগিছে জুই মন্ত্রী ফণীভূষণ চৌধুৰী আছে শুই’

নিয়মীয়া বাৰ্তা ২ নৱেম্বৰঃ বজাৰত লাগিছে জুই আৰু ৰাজ্যৰ যোগানমন্ত্রী ফণীভূষণ আছে শুই৷’ এনে এক শ্লোগান আওৰাই দেওবাৰে পাঠশালাত সদৌ অসম ছাত্র সন্থাৰ (আছু) কর্মীয়ে যোগানমন্ত্রী ফণীভূষণ চৌধুৰীৰ কনভয় আগচি সাব্যস্ত কৰে অভিনৱ প্রতিবাদ৷ পাঠশালাৰ আজাদ ভৱন প্রাংগণত অনুষ্ঠিত অগপৰ মহিলা পৰিষদৰ এখন সভাত অংশগ্রহণ কৰিবলৈ আহি এনেদৰে আছুৰ প্রতিবাদৰ সন্মুখীন হয় যোগানমন্ত্রী চৌধুৰী৷ প্রতিবাদকাৰীসকলে প্রায় ১৫ মিনিট সময় ধৰি আছুৰ পতাকা প্রদর্শন কৰি খাদ্য আৰু অসামৰিক যোগানমন্ত্রী চৌধুৰীকবাট আগচি আবদ্ধ কৰি ৰাখে৷ তাৰ মাজতে অগপ কর্মীসকলেও সেই স্থানত উপস্থিত হৈ উভতি ধৰি একেলগে সমানে অগপ জিন্দাবাদ ধ্বনিৰে পৰিৱেশ উত্তাল কৰি তোলে৷ মন্ত্রী চৌধুৰীক আগচি ‘কা’ আমি নামানো বুলিও আছুৰ সদস্যসকলে প্রতিবাদী শ্লোগান দি পৰিৱেশ উত্তাল কৰি তোলে৷ পাঠশালা আঞ্চলিক ছাত্র সন্থাৰ সভাপতি ধীমান শর্মা আৰু সাধাৰণ সম্পাদক বিশ্বজিৎ গাংগুলীৰ নেতৃত্বত মন্ত্রীগৰাকীৰ সন্মুখত আকস্মিকভাৱে কৰা আজিৰ এই প্রতিবাদী কার্যসূচীত বজালী মহকুমা ছাত্র সন্থাৰ উপদেষ্টা অৰূপজ্যোতি দাস, সাধাৰণ সম্পাদক হিমাংশু শর্মা, পাঠশালা আঞ্চলিক ছাত্র সন্থাৰ উপ– সভাপতি চিন্ময় লহকৰ, ৰূপজ্যোতি কলিতা, অঞ্জনজ্যোতি নাথ, সহকাৰী সাধাৰণ সম্পাদক লাকী মেধি, মনদীপ পাটগিৰি, দীপ গাংগুলী, দীপজ্যোতি পাটগিৰি, ক্রীডা সম্পাদক পিংকু গাংগুলী, পাটাছাৰকুছি আঞ্চলিক ছাত্র সন্থাৰ সভাপতি হানান আলী, সাধাৰণ সম্পাদক ধ্রুৱজ্যোতি শর্মা, দক্ষিণ বজালী আঞ্চলিক ছাত্র সন্থাৰ উপ–সভাপতি নিতুল মালাকাৰ, পাঠশালা আঞ্চলিক ছাত্র সন্থাৰ সদস্য মৃণ্ময় পৰাশৰ, টিকু দাস, মহম্মদ সমীৰ উল্লা, জোনদীপ ৰয় আদিকে ধৰি শতাধিক আছু কর্মী উপস্থিত থাকে৷