নিয়মীয়া বাৰ্তা, ১২ মে’ : যোৰহাটস্থিত অসম কৃষি বিশ্ববিদ্যালয়ৰ চৌহদত আজি এজন অধ্যাপকে আত্মহত্যা কৰা ঘটনাই চাঞ্চল্যৰ সৃষ্টি কৰিছে।
প্ৰাপ্ত তথ্য অনুসৰি, আত্মহত্যা কৰা অধ্যাপকজনৰ নাম ড০ অভিজিৎ শৰ্মা। অসম কৃষি বিশ্ববিদ্যালয়খনৰ কৃষি শস্য বিজ্ঞান (এগ্ৰ’নমি) বিভাগৰ অধ্যাপক আছিল তেওঁ।
আজি পুৱাৰ ভাগত বিশ্ববিদ্যালয়খনৰ নিজৰ বিভাগীয় কাৰ্যালয়ৰ কোঠাত অধ্যাপকজনৰ মৃতদেহ ওলমি থকা অৱস্থাত উদ্ধাৰ কৰিছে আৰক্ষীয়ে। আত্মহত্যাৰ কাৰণ এতিয়ালৈকে জানিব পৰা হোৱা নাই যদিও ঘটনাস্থলীত এখন চুইচাইড নোট উদ্ধাৰ কৰিছে আৰক্ষীয়ে ।
অৱশ্যে বাতৰি সংগ্ৰহ কৰা পৰ্যন্ত এই চুইচাইড নোটৰ বিষয়ে সংবাদ মাধ্যমৰ আগত কোনো তথ্য প্ৰকাশ কৰা নাই আৰক্ষীয়ে ।
ইতিমধ্যে আৰক্ষীয়ে প্ৰাৰম্ভিক তদন্ত প্ৰক্ৰিয়া আৰম্ভ কৰিছে।