নিয়মীয়া বাৰ্তা, ২৭ অক্টোবৰ : ৰঙিয়াত আজি জিলা কৰ্মচাৰী পৰিষদৰ ৩৫তম্ বাৰ্ষিক অধিবেশন অনুষ্ঠিত হয়। ৰঙিয়া বুনিয়াদী প্ৰশিক্ষণ কেন্দ্ৰত অনুষ্ঠিত হোৱা অধিবেশনৰ মুকলি সভাত সভাপতিত্ব কৰে পৰিষদৰ জিলা সভাপতি বিপুল চক্ৰৱৰ্তীয়ে। সভাৰ আৰম্ভনিতে আজি মৃত্যু হোৱা অভিনেতা নিপন গোস্বামীলৈ শ্ৰদ্ধাঞ্জলি জনোৱাৰ লগতে পৰিয়াল বৰ্গলৈ সমবেদনা জ্ঞাপন কৰে। ৰঙিয়া মহকুমাৰ বিভিন্ন চৰকাৰী কায্যালয়ৰ কৰ্মচাৰী সকল উপস্থিত থকা সভাখনত কৰ্মচাৰী সকলে কৰ্মচাৰী পৰিষদৰ বিভিন্ন দিশৰ বিষয়ৰ ওপৰত বক্তব্য আগবঢ়ায়। বিশেষ কৈ এনপিএছ কৰ্মচাৰী সকলে কৰি থকা আন্দোলনত কৰ্মচাৰী পৰিষদে সহযোগ কৰিব বুলিও প্ৰস্তাব গ্ৰহণ কৰে। অৱসৰ গ্ৰহণ কৰাৰ সময়ত মাষ্টৰ ৰ’ল ওৱাৰ্কচাৰ্জ কৰ্মচাৰী সকলক অৱসৰৰ সময়ত এককালীন সাহায্য দিয়াৰ লগতে কৰ্মচাৰী সকলক স্বাস্থ্য বীমা প্ৰদান কৰিবলৈ ৰাজ্য চৰকাৰক দাবী জনাই। ইফালে পুৱাৰ ভাগত পতাকা উত্তোলন কৰে পৰিষদৰ সভাপতি বিপুল চক্ৰৱৰ্তীয়ে। ইয়াৰ পিছত বৃক্ষৰোপন কৰে ডা: চফিকুল হক, পৰিষদৰ প্ৰাক্তন উপ সভাপতি নৰেন্দ্ৰ শৰ্মা আৰু সদৌ অসম মাষ্টৰ ৰ’ল কৰ্মচাৰী সন্থাৰ সভাপতি আজিৰ আলীয়ে। সভাত সৰ্বসন্মতি ক্ৰমে সৰ্বেশ্বৰ লহকৰক সভাপতি আৰু মোহন মাধৱ বৰ্মনক সাধাৰণ সম্পাদক হিচাপে লৈ ৩১ জনীয়া নতুন সমিতি গঠন কৰা হয়।
ফাৰুক হুছেইন