১৭ জানুৱাৰী পর্যন্ত পৰীক্ষা অনুষ্ঠিত নকৰিবলৈ নির্দেশ হাইক’ৰ্টৰ

নিয়মীয়া বাৰ্তা ১১ জানুৱাৰীঃ আইনী মেৰপেঁচৰ পৰা এতিয়াও মুক্ত হ’ব পৰা নাই অসম লোকসেৱা আয়োগৰ সংযুক্ত প্রতিযোগিতামূলক মূল পৰীক্ষা৷ প্রাথমিক পৰীক্ষাৰ অন্তত এতিয়াও আইনী মেৰপেঁচৰ বাবেই মূল পৰীক্ষাৰ দিন নির্ধাৰণ কৰিব পৰা নাই আয়োগে৷ বিশেষকৈ ভাষাৰ বাধ্যতামূলক প্রশ্ণকাকত প্রত্যাহাৰক লৈ সৃষ্টি হোৱা বিতর্কৰ বাবেই সম্পূর্ণ পৰীক্ষাটোৱে সোমাই পৰিছে আইনী মেৰপেঁচত৷ এইবাৰ গুৱাহাটী উচ্চ ন্যায়ালয়ে এ পি এছ চিৰ মূল পৰীক্ষাৰ দিন অহা ১৭ জানুৱাৰী পর্যন্ত ঘোষণা নকৰিবলৈ নির্দেশ দিছে৷ এই সন্দর্ভত দাখিল হোৱা ৮৩/২০২১ নম্বৰৰ ৰাজহুৱা স্বার্থজড়িত আবেদনৰ শুনানি গ্রহণ কৰি উচ্চ ন্যায়ালয়ে এই নির্দেশ প্রদান কৰিছে৷

উল্লেখ্য যে শেহতীয়াকৈ বঙাইগাঁৱত অনুষ্ঠিত কেবিনেটত ৰাজ্য চৰকাৰে ভাষাৰ প্রশ্ণকাকত এ পি এছ চিৰ পৰীক্ষাৰ পৰা প্রত্যাহাৰ কৰিবলৈ সিদ্ধান্ত গ্রহণ কৰিছিল৷ সমান্তৰালভাৱে ভাষাৰ এই বাধ্যতামূলক প্রশ্ণকাকতখনৰ পৰা একাংশ প্রার্থীক বাদ দি আন একাংশৰ বাবে বাধ্যতামূলক কৰাক লৈ গুৱাহাটী উচ্চ ন্যায়ালয়ত কেইবাখনো আবেদন দাখিল কৰিছে৷ ইয়াৰ মাজতে শেহতীয়াকৈ অনুষ্ঠিত আন এক শুনানিত উচ্চ ন্যায়ালয়ে কেবিনেট সিদ্ধান্ত অনুসৰিয়েই ভাষাৰ প্রশ্ণকাকত নোহোৱাকৈয়ে এইবাৰ মূল পৰীক্ষা অনুষ্ঠিত কৰাৰ অনুমতিও প্রদান কৰিছিল৷ কিন্তু ইয়াৰ মাজতে পুনৰ আন এখন ৰাজহুৱা স্বার্থজড়িত আবেদনেৰে ভাষাৰ প্রশ্ণকাকত প্রত্যাহাৰত প্রত্যাহ্বান জনোৱা হয়৷ অৱশ্যে পূর্বৰ বিচাৰপীঠতে এই আবেদনখনৰ শুনানি নোহোৱা বাবেই সংশ্লিষ্ট বিচাৰপীঠলৈ এই আবেদন পুনৰ শুনানিৰ বাবে প্রেৰণ কৰা হৈছিল৷ সোমবাৰে এই আবেদনখনেই সংশ্লিষ্ট বিচাৰপীঠত শুনানিৰ বাবে তালিকাভুক্ত হৈ আহে৷ সেয়েহে ন্যায়ালয়ে এই আবেদনৰ শুনানি গ্রহণ কৰি অহা ১৭ জানুৱাৰী পর্যন্ত মূল পৰীক্ষাৰ দিন ঘোষণা নকৰিবলৈ নির্দেশ দিয়াৰ লগতে একেটা দিনতে পুনৰ শুনানিৰ দিন ধার্য কৰিছে৷ ইয়াৰ লগে লগে পুনৰ এ পি এছ চিৰ মূল পৰীক্ষাৰ দিন নির্ধাৰণক লৈ অনিশ্চয়তা সৃষ্টি হৈছে৷