নিয়মীয়া বাৰ্তা, ২৪ এপ্রিলঃ দিল্লী কেপিটেলছৰ বিপক্ষে খেলা মেচখনত ৰাজস্থান ৰয়েলছৰ অধিনায়ক সঞ্জু ছেমছনে এক নজিৰ গঢ়িবলৈ সক্ষম হয়৷ ২৭ বছৰীয়া খেলুৱৈগৰাকীয়ে ৰাজস্থানৰ হৈ ১০০খন মেচ খেলাৰ লগতে টি–২০ ক্রিকেটত ৫ হাজাৰ ৰান পূর্ণ কৰাৰ গৌৰৱ অর্জন কৰে৷ শততম মেচখনত তেওঁ বেটিং কৰিবলৈ নমাৰ সময়ত ৰাজস্থানৰ ৰান সংখ্যা আছিল ১ উইকেটত ১৫৫৷ আই পি এলৰ অষ্টমটো ছিজনত দলৰ হৈ শততম মেচত অৱতীর্ণ হোৱা সঞ্জুৱে ৰাজস্থানৰ বাবে সংগ্রহ কৰিছে মুঠ ২৫০০ ৰান৷ তেওঁ কালি মেচখনত ৫টা চাৰি আৰু ৩টা ছয়ৰ সহায়ত ১৯টা বলতে অপৰাজিত ৪৬ ৰান সংগ্রহ কৰে৷ ইয়াৰ লগে লগে তেওঁ টি–২০ ক্রিকেটত সম্পূর্ণ কৰে মুঠ ৫,০৩৫ ৰান৷ চলিত আই পি এলত এই পর্যন্ত ৭খন মেচত তেওঁৰ বেটৰ পৰা আহিছে ২৫১ ৰান৷ কালি মেচখনত অ’পেনাৰ জ’ছ বাটলাৰৰ শতৰানৰ সহায়ত ৰাজস্থানে ১৫ ৰানত দিল্লীক পৰাজিত কৰে৷ ইয়াৰ লগে লগে দলটোৱে ৭খন মেচৰ পৰা ১০ পইণ্টেৰে তালিকাৰ তৃতীয় স্থানত আছে৷