নিয়মীয়া বাৰ্তা, ২৯ ছেপ্টেম্বৰঃ শেহতীয়াকৈ ছ’চিয়েল মিডিয়াত অসমৰ দুটি শিশুৰ এখন চিঠি ভাইৰেল হৈ আছে। চিঠিখন প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী ড০ হিমন্ত বিশ্ব শৰ্মালৈ লিখা হৈছে। পত্ৰখনত, শিশুদ্বয়ে প্ৰধানমন্ত্ৰী মোদী আৰু মুখ্যমন্ত্ৰী ড০ শৰ্মাক তেওঁলোকৰ দাঁতৰ সমস্যাৰ বিষয়ে অভিযোগ কৰিছে।
দৰাচলতে, ৬ বছৰীয়া ৰেইছা ৰাওজা আহমেদ আৰু ৫ বছৰীয়া আৰিয়ান আহমেদে প্ৰধানমন্ত্ৰী মোদী আৰু মুখ্যমন্ত্ৰী ড০ শৰ্মালৈ দুখন পৃথক পত্ৰ প্ৰেৰণ কৰিছে। ৰাওজা আৰু আৰিয়ানে পত্ৰখনত তেওঁলোকৰ দাঁতৰ বিষয়ে অভিযোগ কৰিছে।
ফেচবুকযোগে এই দুই শিশুৰ চিঠি দুখন তেওঁলোকৰ খুৰাক মুখতাৰ আহমেদে শ্বেয়াৰ কৰিছে।
পত্ৰখনত দুই শিশুৱে প্ৰধানমন্ত্ৰী মোদী আৰু মুখ্যমন্ত্ৰী ড০ শৰ্মাক সম্বোধন কৰি লিখিছে- ‘অনুগ্ৰহ কৰি প্ৰয়োজনীয় ব্যৱস্থা লওক’। পত্ৰখনত এইটোও উল্লেখ কৰা হৈছে যে তেওঁলোকে দাঁত নথকাৰ বাবে তেওঁলোকৰ প্ৰিয় খাদ্যসমূহ সঠিকভাৱে চোবাব নোৱাৰে। এখন পত্ৰত লিখিছে, ‘মৰমৰ মোদীজী। মোৰ ৩টা দাঁত গজা নাই, তাৰবাবে মোৰ আহাৰ চোবাওতে সমস্যা হৈছে।’
ইফালে এই ঘটনাৰ পাছত মুখ্যমন্ত্ৰী ড০ হিমন্ত বিশ্ব শৰ্মাই টুইটযোগে গুৱাহাটীতে শিশুদ্বয়ৰ বাবে দন্ত চিকিৎসকৰ ব্যৱস্থা কৰাৰ কথা উল্লেখ কৰে। মুখ্যমন্ত্ৰী ড০ শৰ্মাই টুইটাৰত এই বাতৰিটো শ্বেয়াৰ কৰি লিখিছে যে তোমালোকৰ বাবে গুৱাহাটীত এজন ভাল দন্ত চিকিৎসকৰ ব্যৱস্থা কৰিম, যাতে আমি একেলগে তোমালোকৰ প্ৰিয় খাদ্য উপভোগ কৰিব পাৰোঁ।
I’ll be happy to arrange a good dentist in Guwahati for you so that we can enjoy your favourite food together. https://t.co/feeSJFsBg7
— Himanta Biswa Sarma (@himantabiswa) September 29, 2021