নিয়মীয়া বাৰ্তা, ১৬ ছেপ্টেম্বৰ : অসম আন্দোলনৰ বলিষ্ঠ কন্ঠ, জাতীয়তাবাদী নেতা সদ্য প্ৰয়াত প্ৰণৱজিত চলিহা ওৰফে ৰমুৰ বাসগৃহত আজি উপস্থিত হয় অসম চৰকাৰৰ কেবিনেট মন্ত্ৰী, অগপৰ সভাপতি অতুল বৰা ৷ আজি দিনৰ ভাগত জিলা অগপ নেতা ঘন গগৈৰ সৈতে মন্ত্ৰী অতুল বৰাই প্ৰয়াত প্ৰণৱজিত চলিহাৰ ফুকন নগৰস্থিত বাসগৃহত উপস্থিত হৈ প্ৰয়াত চলিহাৰ প্ৰতিচ্ছবিৰ সন্মুখত বন্তি প্ৰজ্বলনেৰে শ্ৰদ্ধা নিবেদন কৰে ৷ ইয়াৰ পিছতেই মন্ত্ৰীগৰাকীয়ে চলিহাৰ পত্নী, কন্যা আৰু পুত্ৰ শৃংখল চলিহাৰ সৈতে দীৰ্ঘ সময় বাৰ্তালাপ কৰে ৷ সংবাদ মাধ্যমৰ সৈতে হোৱা বাৰ্তালাপত প্ৰণৱজিত চলিহাৰ স্মৃতি সুঁৱৰি আৱেগিক হৈ পৰে মন্ত্ৰী তথা প্ৰাক্তন আছু নেতা অতুল বৰা ৷ প্ৰণৱজিত চলিহাৰ অদম্য সাহস, জাতিপ্ৰেম অনন্য আৰু বিৰল বুলি অভিহিত কৰে ৷ মন্ত্ৰী, বিধায়ক, নেতা হোৱাৰ সুৰ্বণ সুযোগ লাভ কৰাৰ পিছতো সেই সুযোগ হেলাৰঙে প্ৰত্যাখ্যান কৰি প্ৰণৱজিত চলিহাই যিখিনি সেৱা ৰাজ্যৰ লগতে শিৱসাগৰ জিলাবাসীক দি থৈ গ’ল, সেয়া সঁচাকৈয়ে প্ৰশংসনীয় ৷ এগৰাকী অসম আন্দোলনৰ অগ্ৰণী নেতা, এক শক্তিশালী জাতিসত্তাৰে উজলি উঠা প্ৰণৱজিত চলিহাই ক্ৰীড়া জগতখনৰো অন্য এক উল্লেখনীয় ভলীবল খেলুৱৈ হিচাপে ৰাজ্যজুৰি সমাদৃত হৈছিল ৷ সেয়ে অসম আৰু অসমীয়াক ভাল পোৱা প্ৰতিগৰাকী ব্যক্তিয়েই এইগৰাকী মহান সিংহপুৰুষক আজীৱন সুঁৱৰিব বুলি মন্তব্য কৰে ৷ ইফালে, আজি প্ৰয়াত চলিহাৰ বাসগৃহত গৈ উপস্থিত হয়গৈ একালৰ আন এগৰাকী আছু নেতা তথা বৰ্তমানৰ অসম প্ৰদেশ কংগ্ৰেছ কমিটীৰ কাৰ্য্যকৰী সভাপতি ৰাণা গোস্বামী ৷ অবিভক্ত শিৱসাগৰ জিলাখনৰেই এগৰাকী অত্যন্ত জাতীয়তাবাদী মনৰ মানুহ প্ৰণৱজিত চলিহাৰ নেতৃত্বতেই অসম আন্দোলন কৰাৰ কথা ৰাণা গোস্বামীয়ে ব্যক্ত কৰে ৷
প্ৰেৰক আশ্ৰফুৰ ৰহমান