নিয়মীয়া বাৰ্তা ২৫ জানুৱাৰীঃ ৰাজ্যৰ প্রগতি আৰু উন্নয়নৰ ক্ষেত্রত বিগত চাৰে চাৰিটা বছৰৰ কার্যকালত বর্তমানৰ ৰাজ্য চৰকাৰখনে যি সফলতা আহৰণ কৰিছে, তাৰ বাবেই পুনৰ ২০২১ চনত বিজেপি চৰকাৰ অসমত প্রতিষ্ঠা হ’ব৷ –এই মন্তব্য মুখ্যমন্ত্রী সর্বানন্দ সোণোৱালৰ৷ দেওবাৰে নলবাৰীৰ কেন্দুকুছিত অনুষ্ঠিত বিজেপিৰ বিজয় সংকল্প সমাৱেশত বিধানসভা নির্বাচনৰ ৰণডংকা বজাই মুখ্যমন্ত্রী সোণোৱালে কয়– ‘আজিৰ দিনটোত বজালী, নলবাৰী, বাক্সা আৰু কামৰূপৰ ভাৰতীয় জনতা পার্টীৰ নিষ্ঠাৱান কর্মকর্তাসকলে প্রমাণ কৰি দেখুৱালে যে অসমৰ ৰাইজৰ হূদয়ত জনতা পার্টীৰ প্রতি আস্থা আৰু বিশ্বাস আছে৷ আজিৰ বিপুল জনসমাগমে এই ইংগিত বহন কৰিছে যে ২০২১ চনত পুনৰ ভাৰতীয় জনতা পার্টীৰ চৰকাৰ হ’ব৷ ২০১৬ চনত বিজেপিয়ে বৰাক–ব্রহ্মপুত্র, পাহাৰ–ভৈয়ামৰ সকলো শ্রেণীৰ জনসাধাৰণৰ সহযোগত চৰকাৰ গঠন কৰিছিল৷ তেতিয়াই দুর্নীতিমুক্ত, বিদেশীমুক্ত, প্রদূষণমুক্ত, সন্ত্রাসবাদমুক্ত আৰু বিকশিত অসম নির্মাণ কৰিব বুলি সংকল্প লৈছিল৷ এনে এখন চৰকাৰ গঢ় দিয়াৰ বাবে যোৱা চাৰে চাৰি বছৰত প্রধানমন্ত্রী নৰেন্দ্র মোদী আৰু গৃহমন্ত্রী অমিত শ্বাহৰ সহযোগত যিধৰণে কাম কৰিলে ইয়াৰ ফলত আজি অসমৰ মানচিত্রই ভাৰতবর্ষৰ বুকুত সুকীয়া স্থান লাভ কৰিবলৈ সক্ষম হৈছে৷’
সততা আৰু নিষ্ঠাৰে কাম কৰিলে সকলো সম্ভৱ বুলি উল্লেখ কৰি মুখ্যমন্ত্রী সোণোৱালে কয় যে কংগ্রেছৰ ভ্রষ্টাচাৰ আৰু দুর্নীতি দূৰ কৰিবলৈ ৰাজ্য চৰকাৰে বলিষ্ঠ পদক্ষেপ গ্রহণ কৰিছে৷ চৰকাৰখনৰ সৎসাহস আৰু নিষ্ঠাৰে কাম কৰাৰ মানসিকতা থকাৰ বাবে দুর্নীতিৰ বিৰুদ্ধে শক্তিশালী পদক্ষেপ গ্রহণ কৰিছে৷ দুর্নীতিৰ বিৰুদ্ধে চলোৱা নিৰন্তৰ অভিযানৰ ফলত আজি অসমৰ বুকুত দুর্নীতিমুক্ত প্রশাসন ব্যৱস্থা গঢ়ি তোলা সম্ভৱ হৈছে৷ দুর্নীতিমুক্ত ব্যৱস্থাৰ বাবে দুখীয়া পৰিয়ালৰ সন্তানেও মেধাৰ ভিত্তিত অসম লোকসেৱা আয়োগৰ পৰীক্ষাত উত্তীর্ণ হৈ চাকৰি লাভ কৰিবলৈ সক্ষম হৈছে৷ প্রদূষণমুক্ত অসম গঢ়াৰ বাবে ৮.৫ কোটি বৃক্ষৰোপণ কৰাৰ ফলত বর্তমান চৰকাৰৰ কার্যকালত ২২২ বর্গকিলোমিটাৰ বনাঞ্চল বৃদ্ধি হৈছে৷ স্থায়ী শান্তি প্রতিষ্ঠাৰ বাবে সন্ত্রাসবাদমুক্ত অসম গঢ়াৰ বলিষ্ঠ পদক্ষেপ গ্রহণ কৰা হৈছে৷ বিদেশীমুক্ত অসম গঢ়াৰ বাবে ভাৰত–বাংলাদেশ সীমান্ত ছীল কৰাৰ বাবে ৰাজ্য চৰকাৰে সংকল্প লৈছে বুলি মন্তব্য কৰি মুখ্যমন্ত্রী সোণোৱালে কয়– ‘ইজৰাইলৰ প্রযুক্তি প্রয়োগ কৰি ব্রহ্মপুত্রৰ বুকুত ভাৰত–বাংলাদেশ সীমান্ত ছীল কৰা হ’ল৷ ইয়াৰ ফলত অবৈধ অনুপ্রৱেশ বন্ধ হ’ল৷ বিভিন্ন শৈক্ষিক প্রতিষ্ঠান স্থাপন কৰি ৰাজ্য চৰকাৰে যুৱ প্রজন্মক দৃঢ়তাৰে আগুৱাই নিয়াৰ বাবে পদক্ষেপ গ্রহণ কৰিছে৷ নতুন চিকিৎসা মহাবিদ্যালয়, এইমছ, ভাৰতীয় কৃষি প্রতিষ্ঠান, অভিযান্ত্রিক মহাবিদ্যালয়, পলিটেকনিক মহাবিদ্যালয় আদি স্থাপন কৰা হৈছে৷ ভাৰতীয় জনতা পার্টীৰ চৰকাৰেহে অসমীয়া জাতিৰ মান, সন্মান, স্বাভিমান ৰক্ষা কৰিব পাৰিব৷ আন দলৰ সেই ক্ষমতা আৰু শক্তি নাই৷’
কংগ্রেছৰ নেতৃত্বত গঠিত মহাজোঁটবন্ধনক সমালোচনা কৰি তেওঁ কয় যে কংগ্রেছ আৰু বদৰুদ্দিন আজমলৰ সাম্প্রদায়িক চিন্তা–চর্চাক নিঃশেষ কৰাৰ বাবে কেৱল ভাৰতীয় জনতা পার্টীহে দৃঢ়তা দেখুৱাব পাৰিব৷ বিজেপিয়ে বীৰ লাচিত বৰফুকন, বীৰ চিলাৰায়, মহাপুৰুষ শ্রীমন্ত শংকৰদেৱ, মহাপুৰুষ মাধৱদেৱৰ আদর্শ অসমৰ বুকুত স্থায়ীভাৱে জীয়াই ৰখাৰ ক্ষেত্রত স্পষ্টভাৱে শক্তিশালী পদক্ষেপ গ্রহণ কৰিছে৷ কংগ্রেছে ৫৫টা বছৰত লাখ লাখ বিঘা মাটি অবৈধ বিদেশীক দিয়াৰ বাবে খিলঞ্জীয়া অসমীয়াসকল শংকিত হৈ পৰিছিল৷ খিলঞ্জীয়া ভূমিপুত্রসকল নিৰাপত্তাহীনতাত ভুগিছিল৷ বিজেপিয়ে চৰকাৰ গঠন কৰাৰ লগে লগে ৬ লাখ খিলঞ্জীয়া ভূমিপুত্রক মাটিৰ পট্টাৰ প্রদানেৰে তেওঁলোকৰ হাহাকাৰ অৱস্থাৰ অৱসান ঘটাবলৈ সংকল্প লৈছিল বুলি উল্লেখ কৰি সোণোৱালে কয়– ‘খিলঞ্জীয়া লোকসকলে ৭০টা বছৰে অনিশ্চয়তাৰ মাজত দিন কটাবলগীয়া হৈছিল৷ বর্তমানৰ ৰাজ্য চৰকাৰখনৰ চমু কার্যকালত বর্তমানলৈ ৩.৩৮ লাখ খিলঞ্জীয়াক মাটিৰ পট্টা প্রদান কৰা হৈছে৷ অসমীয়া জাতিৰ মাটি, ভেটি, ভাষা, কৃষ্টি–সংস্কৃতি, ঐতিহ্য যদি কোনোবাই ৰক্ষা কৰিব পাৰে, সেয়া হৈছে ভাৰতীয় জনতা পার্টী৷ নতুন ৰাজনৈতিক দলসমূহে অসমীয়া জাতিক নিৰাপত্তা দিব নোৱাৰে৷ তেওঁলোকৰ উদ্দেশ্য হ’ল মন্ত্রী–বিধায়ক হোৱা৷ এই দলসমূহে জাতিৰ স্বার্থত কোনোদিনে নিষ্ঠা আৰু সততাৰে কাম কৰিব নোৱাৰে৷ বদৰুদ্দিন আজমলৰ দৰে সাম্প্রদায়িক শক্তিৰ সৈতে মিতিৰালি স্থাপন কৰি ক্ষমতা দখলৰ অপচেষ্টা চলাইছে৷ আগন্তুক দিনত সেয়া সম্পূর্ণৰূপে নিঃশেষ কৰা হ’ব৷ অসমীয়া জাতিক নিৰাপত্তা দিবৰ বাবে আমি সর্বোচ্চ ত্যাগ কৰিবলৈ সাজু৷ অসমৰ সকলো শ্রেণীৰ জনসাধাৰণৰ নিৰাপত্তা সুনিশ্চিত কৰি অসমক ভাৰতৰ অন্যতম শ্রেষ্ঠ ৰাজ্য হিচাপে গঢ়ি তোলা হ’ব৷’