বিশেষ বাৰ্তা, ৮ এপ্ৰিলঃ বিজেপিৰ অন্যান্য পিছপৰা শ্ৰেণী (অ’ বি চি) মৰ্চাৰ উদ্যোগত আজি মৰিয়নিত প্ৰবোধ ব্যক্তিৰ সন্মিলন আৰু সম্বৰ্ধনা অনুষ্ঠানৰ আয়োজন কৰা হয়। ভাৰতীয় জনতা পাৰ্টিৰ ৪৪ সংখ্যক প্ৰতিষ্ঠা দিৱসৰ লগত সংগতি ৰাখি মৰিয়নি মণ্ডল বিজেপি কাৰ্য্যালয়ত এই সন্মিলন অনুষ্ঠিত কৰা হৈছিল। এই অনুষ্ঠানত দলটোক কিদৰে ৰাইজৰ মাজলৈ অধিক দৃঢ়ভাৱে নিব পাৰি তাৰ ওপৰত আলোচনা কৰা হয় । তাৰোপৰি বিজেপিৰ ‘ ঘৰ ঘৰ চলো গাঁও গাঁও চলো’ কাৰ্য্যসূচীও ৰূপায়ণ কৰা হয় এই অনুষ্ঠানৰ যোগেদি । উক্ত অনুষ্ঠানত বিজেপিৰ অ’ বি চি মৰ্চাৰ ৰাষ্ট্ৰীয় কোষাধ্যক্ষ সুৰেন্দ্ৰা বোডোলিয়াৰ লগতে ৰাজ্যিক অ’ বি চি মৰ্চাৰ উপ-সভাপতি লাচিত গগৈয়ে অংশগ্ৰহন কৰে। অনুষ্ঠানত অংশগ্ৰহণ কৰি বিজেপিৰ অ’ বি চি মৰ্চাৰ ৰাজ্যিক উপ-সভাপতি লাচিত গগৈয়ে কয় এই ‘ঘৰ ঘৰ চলো গাঁও গাঁও চলো’ কাৰ্য্যসূচীৰ যোগেদি সমাজৰ জ্যেষ্ঠ ব্যক্তিসকলক সন্মান জনোৱাৰ লগতে অ’ বি চি লোকসকলৰ বিভিন্ন সমস্যা সম্পৰ্কে আলোচনা কৰা হয়। তেওঁ লগতে কয়- দেশৰ সেৱাৰ বাবে বিজেপি কৰ্মীসকলে কাম কৰি আছে, ইয়াত নিজ স্বাৰ্থৰ কথা নাহে। তেনে লোকৰ বিজেপি দলত কোনো স্থান নাই বুলিও মন্তব্য কৰে। অনুষ্ঠানটোত বহুকেইজন প্ৰবীন বিজেপি কৰ্মীৰ লগতে সমাজৰ কেইবাগৰাকীও জ্যেষ্ঠ ব্যক্তি, শিক্ষক আদিক সম্বৰ্ধনা জনোৱা হয়। একেটা অনুষ্ঠানতে ৰাজ্যিক ভিত্তিক প্ৰতিযোগিতাত পদক অৰ্জন কৰা মৰিয়নি মাৰ্চিয়েল আৰ্ট এচ’চিয়েছনৰ ক্ৰীড়াপ্ৰতিভাসকলকো সম্বৰ্ধনা জনোৱা হয়। কপিল বৰুৱাই আঁত ধৰা অনুষ্ঠানটোত মৰিয়নি মণ্ডল বিজেপিৰ সভাপতি কৃষ্ণ ভূমিজ, যোৰহাট জিলা বিজেপিৰ উপ-সভাপতি শম্ভু পাল, কাটনি গাঁও পঞ্চায়তৰ সভাপতি অপূৰ্ব শইকীয়া, মৰিয়নি পৌৰসভাৰ সদস্য চুমকি দত্ত মজুমদাৰ আদি জিলা আৰু মণ্ডলৰ বহুকেইজন নেতা উপস্থিত থাকে।
প্ৰেৰক দিব্যজ্যোতি শইকীয়া