নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

ৰাভা হাছঙত বিজেপিৰ জয়ৰ অশ্বমেধ, ৩৩ আসনৰ ৩০খনেই এনডিএৰ দখলত, বিৰোধী ধূলিসাৎ

নিয়মীয়া বাৰ্তা ডিজিটেল, ৫ এপ্ৰিলঃ পুনৰবাৰ বিৰোধীক ধূলিসাৎ কৰি ৰাভা হাছং স্বায়ত্তশাসিত পৰিষদ দখল কৰিলে বিৰোধী আৰু মিত্রজোঁটে৷ স্বায়ত্তশাসিত পৰিষদৰ ৩৬খন আসনৰ ভিতৰত ৩৪খন আসন ৰাভা হাছং যৌথ সংগ্রাম সমিতি আৰু বিজেপিয়ে দখল কৰাৰ বিপৰীতে বিৰোধী কংগ্রেছ মাত্র এখন আসনতে সন্তুষ্ট থাকিবলগীয়া হ’ল৷ আনহাতে, এখন আসন দখল কৰিলে নির্দলীয় প্রার্থীয়ে৷ উল্লেখ্য যে নির্বাচনত তিনিখন আসনত বিজেপি আৰু মিত্রদলৰ প্রার্থী বিনাপ্রতিদ্বন্দ্বিতাৰে জয়ী হৈছে৷ ৰাভা হাছং স্বায়ত্তশাসিত পৰিষদৰ মুখ্য সদস্য টংকেশ্বৰ ৰাভাই দক্ষিণ দুধনৈ পৰিষদীয় সমষ্টিৰ পৰা ৫,৫৬৮টা ভোটত জয়লাভ কৰে৷ আনহাতে, কংগ্রেছ দলৰ একমাত্র প্রার্থী হিচাপে কুশধোৱা দৰংগিৰি আসনৰ পৰা পৰমা ৰাভা জয়যুক্ত হ’বলৈ সক্ষম হয়৷ এইবাৰ নির্বাচনত কামৰূপ জিলাৰ ১৬টা পৰিষদীয় সমষ্টিৰ ভিতৰত তিনিটাত বিজেপি আৰু বাকী ১৩টা সমষ্টিত ৰাভা হাছং যৌথ সংগ্রাম সমিতিৰ প্রার্থীয়ে জয়লাভ কৰিবলৈ সক্ষম হয়৷ একেদৰে গোৱালপাৰা জিলাৰ ১৯টা সমষ্টিৰ ১৮টা সমষ্টি বিজেপি আৰু মিত্রদলে জয়লাভ কৰিবলৈ সক্ষম হয়৷

ফলাফল অনুসৰি কামৰূপ জিলাৰ ১৬টা পৰিষদীয় সমষ্টিৰ ১৩টা ৰাভা হাছং যৌথ সংগ্রাম সমিতি আৰু তিনিটাত বিজেপিয়ে জয়লাভ কৰিবলৈ সক্ষম হয়৷ ইয়াৰে লুকী সমষ্টিৰ পৰা এগৰাকী নির্দলীয় প্রার্থী জয়ী হয়৷ ২৭নং বকো পৰিষদীয় সমষ্টিত সুমিত ৰাভা, ২৬নং জোঙাখুলী পৰিষদীয় সমষ্টিত অর্জুন ছেত্রী, ২৮নং উত্তৰ বনগাঁও পৰিষদীয় সমষ্টিত আদিত্য ৰাভাই জয়লাভ কৰে৷ আনহাতে, ২৩নং চলিহাকোট সমষ্টিৰ পৰা নগৰমল স্বর্গীয়াৰী, ২৫নং হাহিম সমষ্টিৰ পৰা সোণামাৰ ৰাভা বিনাপ্রতিদ্বন্দ্বিতাৰে জয়ী হৈছিল৷ ৩০নং বামুণীগাঁও সমষ্টিৰ পৰা অজিত ৰাভা, ২২নং বোন্দাপাৰা সমষ্টিৰ পৰা মেঘালী ৰাভা, ২৪নং লুকী সমষ্টিৰ পৰা ৰেলিনা জে চাংমা, ৩২নং পাণ্টান সমষ্টিৰ পৰা ৰমাকান্ত ৰাভা, ৩১নং গোৱর্ধন সমষ্টিৰ পৰা জ্যোতিষ ৰাভা, ৩৬নং সমষ্টিৰ পৰা পুষ্পাঞ্জলি কুমাৰী বড়ো, ৩৫নং শিলপোতা সমষ্টিৰ পৰা কমলেশ্বৰ ৰাভা, ২৯নং বনগাঁও সমষ্টিৰ পৰা মিনতি বড়ো, ৩৪নং চানডুবি সমষ্টিৰ পৰা নৃপেন চন্দ্র ৰাভা আৰু ৩৩নং কুলচী সমষ্টিৰ পৰা ৰশ্মি বালা ৰাভাই জয়লাভ কৰিছে৷

পলাশবাৰীত ৰাভা হাছং যৌথ মঞ্চৰ ৪গৰাকী প্রার্থীৰ জয়
ৰাভা হাছং স্বায়ত্তশাসিত পৰিষদৰ নির্বাচনত বিজেপি আৰু ৰাভা হাছং যৌথ মঞ্চৰ ৪গৰাকী প্রার্থীয়ে জয়লাভ কৰিবলৈ সক্ষম হৈছে৷ ইয়াৰে পলাশবাৰী সমষ্টিৰ অন্তর্গত কুলচী, চানডুবি, শিলপোতা আৰু ৰাণী সমষ্টিৰ পৰা ক্রমে ৰশ্মিবালা ৰাভা, নৃপেন ৰাভা, কমলেশ্বৰ ৰাভা আৰু পুষ্পাঞ্জলি কুমাৰীয়ে জয়লাভ কৰিছে৷

ৰাভা হাছং স্বায়ত্তশাসিত পৰিষদৰ নির্বাচনত এনডিএৰ জয়যাত্রা অব্যাহত
ঘোষিত ৰাভা হাছং স্বায়ত্তশাসিত পৰিষদৰ নির্বাচনত গোৱালপাৰা জিলাৰ মহিলাৰ বাবে সংৰক্ষিত চাৰিওটা সমষ্টিৰ এনডিএৰ প্রার্থী ক্রমে ৬নং উত্তৰ দুধনৈৰ উজ্জ্বলা ব্রহ্ম, ৪নং ৰংজুলি সমষ্টিৰ মণিদ্বীপা ৰাভা, ১৩নং পূব আজগৰ সমষ্টিৰ ভুলাই বালা ৰাভাই জয়লাভ কৰিছে৷ জিলাখনৰ ২০নং জয়ৰামকুছি সমষ্টিত ইতিমধ্যে প্রেমজুলী ৰাভাই বিনাপ্রতিদ্বন্দ্বিতাৰে জয়লাভ কৰিবলৈ সক্ষম হৈছে৷

You might also like