🟥বিজনীত মুখ্যমন্ত্ৰী ড০ হিমন্ত বিশ্ব শৰ্মাৰ প্ৰচাৰ
নিয়মীয়া বাৰ্তা, ৩ মে’ : তৃতীয় পৰ্যায়ত অনুষ্ঠিত হ’বলগীয়া লোকসভাৰ নিৰ্বাচনৰ পৰিপ্ৰেক্ষিতত কোকৰাঝাৰ লোকসভা সমষ্টিৰ অধীনৰ চিৰাং জিলাত শাসকীয় দলৰ লগতে বিৰোধী দলৰ তীব্ৰ হৈ উঠিছে নিৰ্বাচনৰ প্ৰচাৰ অভিযান৷
ইয়াৰ অংশ হিচাপে মুখ্যমন্ত্ৰী ড০ হিমন্ত বিশ্ব শৰ্মাই বিয়লি চিৰাং জিলাৰ বিজনী বিধানসভা সমষ্টিৰ উলুবাৰীত এখন নিৰ্বাচনী প্ৰচাৰ সভাত অংশ গ্ৰহণ কৰে৷ বিজনী বিধানসভা সমষ্টিৰ অন্তৰ্গত উলুবাৰীত কাজহুৱা খেল পথাৰত কোকৰাঝাৰ লোকসভা সমষ্টিৰ বিজেপি মিত্ৰজোঁটৰ প্ৰাৰ্থী জয়ন্ত বসুমতাৰীৰ সমৰ্থনত মুখ্যমন্ত্ৰী ড০ হিমন্ত বিশ্ব শৰ্মাই নিৰ্বাচনী সভাত অংশ লৈ পোনতে ৰাইজৰ সতে দলীয় গীতত অংশ লৈ অসমত বিজেপি ইউ পি পি এলৰ মিত্ৰজোঁটৰ চৰকাৰ নাথাকিলে পুনৰ বিটিচি অশান্ত হব বুলি মত ব্যক্ত কৰে৷ তেওঁ ভাষণত সমাগত ছমাহৰ ভিতৰত বন্ধ হৈ থকা আধাৰ কাৰ্ডৰ সমস্যা দূৰ কৰিব বুলি উল্লেখ কৰে৷ লগতে বিজনী সমষ্টিৰ অৰুণোদয় নোপোৱা পৰিয়ালত অৰুণোদয় প্ৰদান কৰিব বুলিও উল্লেখ কৰে৷ 
প্ৰায় দহ হেজাৰৰোধিক লোকৰ সমাগম ঘটা মিত্ৰ জোঁটৰ সভাত মুখ্যমন্ত্ৰী ড০ হিমন্ত বিশ্ব শৰ্মাই বিজেপি মিত্ৰজোঁটৰ সমৰ্থিত প্ৰাৰ্থী জয়ন্ত বসুমতাৰীক বিপুল ভোটত জয়ী কৰিবলৈ আহ্বান জনায় ৷ মিত্ৰজোঁটৰ এই প্ৰচাৰ সভাত বিটিচিৰ মুখ্য কাৰ্যবাহী সদস্য প্ৰমোদ বড়ো, অসম গণ পৰিষদৰ সভাপতি তথা মন্ত্ৰী অতুল বৰাৰ লগতে মন্ত্ৰী ৰঞ্জিত কুমাৰ দাসে ভাষণ প্ৰদান কৰে৷ সভাত মন্ত্ৰী উৰ্খাও গৌৰা ব্ৰহ্ম, বিজনীৰ বিধায়ক অজয় কুমাৰ ৰায়সহ কেবাজনো বিধায়ক, বিটিচিৰ কাৰ্যবাহী সদস্য, পৰিষদীয় সদস্য উপস্থিত থাকে ৷
প্ৰেৰক বৰ্ণালী তালুকদাৰ