ক’ভিডকাল চৰকাৰৰ এছ’পি মানিহে ৰাজ্যত এইবাৰৰ শাৰদীয় দুর্গোৎসৱ

নিয়মীয়া বাৰ্তা ২৭ ছেপ্টেম্বৰঃ ৰাজ্যৰ ক’ভিড পৰিস্থিতি উন্নত হোৱাৰ লগে লগে বিভিন্ন সেৱাত শিথিলতা প্রদান কৰা হৈছে৷ সান্ধ্য আইনৰ সময় হ্রাস কৰাৰ লগতে দশম, দ্বাদশ আৰু স্নাতক–স্নাতকোত্তৰ চূড়ান্ত বর্ষৰ পাঠদান আৰম্ভ কৰা হৈছে৷ সমান্তৰালভাৱে ৰাজ্যত এইবাৰ দুর্গোৎসৱ আয়োজনৰ বাবেও ৰাজ্য চৰকাৰে অনুমতি প্রদান কৰিছে৷ অৱশ্যে কি কি নীতি–নিয়মৰ মাজেৰে এই দুর্গোৎসৱ আয়োজন কৰা হ’ব, সেই সন্দর্ভত সুকীয়া এছ অ’ পি প্রকাশ কৰা হৈছে৷ ক’ভিড আক্রান্তৰ হাৰ হ্রাস পোৱাৰ প্রতি লক্ষ্য ৰাখি কঠোৰ নীতি–নিয়মৰ মাজেৰে অনুমতি প্রদান কৰিলেও পূর্বৰ দৰে জাকজমকীয়া নহ’ব এইবাৰৰ দুর্গোৎসৱো৷

ক’ভিড মহামাৰীৰ এই সময়ছোৱা অত্যধিক জাকজমকতাৰে দুর্গোৎসৱ আয়োজন কৰিবলৈ আগ্রহী নহয় আয়োজক সমিতিসমূহ৷ পূর্বে সর্বাধিক ২৫–৩০ লাখ টকালৈকে বাজেটেৰে দুর্গোৎসৱৰ আয়োজন কৰা কমিটীসমূহেও এইবাৰ সাধাৰণভাৱেই আয়োজন কৰিছে দুর্গাপূজাৰ৷ বিগত বর্ষৰ দৰেই এইবাৰো পৰম্পৰা ৰক্ষা কৰি কেৱল আধ্যাত্মিক আৰু ধর্মীয় নীতি–নিয়মসমূহ পালন কৰাৰ বাবেহে প্রস্তুতি আৰম্ভ কৰিছে দুর্গাপূজাৰ আয়োজক সমিতিসমূহে৷ ৰাজ্যৰ ভিন্ন প্রান্তৰ লগতে গুৱাহাটী মহানগৰীত সর্বাধিক পূজাৰ আয়োজন কৰাৰ লগতে বৃহৎ বাজেটেৰে আকর্ষণীয় কৰি তোলা হয় মণ্ডপ৷ বিশেষকৈ লতাশিল, চানমাৰি, বিষ্ণুপুৰ, বেলতলা, পাণ্ডু ৰেষ্টকেম্প আদিৰ পূজা ভক্তসকলৰ বাবে আকর্ষণৰ কেন্দ্রবিন্দু হৈ পৰে৷ চকু ছাট মাৰি ধৰা আলোকসজ্জা, বৃহৎ পূজা মণ্ডপেৰে ভক্তক আকর্ষণৰ একপ্রকাৰ অঘোষিত প্রতিযোগিতা চলে এই পূজা কমিটীসমূহৰ মাজত৷ কিন্তু এইবাৰ মহানগৰীৰ এই পূজাসমূহত নাথাকিব চকু ছাট মাৰি ধৰা আলোকসজ্জা তথা বৃহৎ মণ্ডপ৷

লতাশিলত আয়োজন কৰা সার্বজনীন দুর্গাপূজা সন্দর্ভত কমিটীৰ বিষয়ববীয়া কৈলাস শর্মাই কয় যে চৰকাৰে প্রকাশ কৰা এছ অ’ পি অনুসৰি এইবাৰো তেওঁলোকে সাধাৰণভাৱে পূজাৰ আয়োজন কৰিছে৷ এই দুর্গোৎসৱত কোনো ধৰণৰ বাহ্যিকতা নাথাকিব৷ বৰঞ্চ সৰু মূর্তি আনি ধর্মীয় ৰীতি–নীতি অনুসৰিহে মা দুর্গাৰ পূজা সম্পন্ন কৰা হ’ব৷ এই প্রসংগত তেওঁ কয়– ‘লতাশিলৰ পূজাৰ সৈতে জড়িত সকলোৱে ইতিমধ্যে ভেকচিন লৈছে৷ আমি কোনো ধৰণৰ বৃহৎ পেণ্ডেলৰ ব্যৱস্থা কৰা নাই৷ পূর্বে লতাশিলত ২০–২৫ লাখ টকা পর্যন্ত ব্যয়েৰে পূজা মণ্ডপ বনোৱা হৈছিল৷’

ইপিনে ঐতিহ্যমণ্ডিত উগ্রতাৰা মন্দিৰতো ক’ভিড প্রট’কল মানি দুর্গাপূজা অনুষ্ঠিত কৰা হ’ব৷ মন্দিৰ পৰিচালনা কমিটীৰ হৈ কৈলাস শর্মাই প্রকাশ কৰা অনুসৰি উগ্রতাৰা দেৱালয়ত এইবাৰ নাথাকিব ৰাজহুৱা ম’হ বলি৷ কেৱল পৰম্পৰা ৰক্ষা কৰি মন্দিৰৰ ফালৰ পৰা মাত্র এটা ম’হ এইবাৰ বলি দিয়া হ’ব৷ অৱশ্যে ম’হৰ বাহিৰে আন ৰাজহুৱা বলি গ্রহণ কৰা হ’ব বুলিও তেওঁ সদৰী কৰে৷ আনহাতে সাধাৰণভাৱে পূজাৰ আয়োজন কৰিছে ৰিহাবাৰী বিলপাৰ দুর্গাপূজা কমিটীয়েও৷ এই পূজাখনৰ আয়োজন কৰা ফ্রণ্টিয়াৰ ক্লাবৰ যুটীয়া সম্পাদক জয়দীপ দাস গুপ্তাই প্রকাশ কৰা অনুসৰি এইবাৰ পূর্বৰ দৰে মণ্ডপ অথবা আলোকসজ্জাৰ ব্যৱস্থা কৰা নহ’ব৷ পূর্বে ২০ লাখ টকা পর্যন্ত আলোকসজ্জা আৰু মণ্ডপৰ নামত ব্যয় কৰা হৈছিল৷ কিন্তু এইবাৰ মাত্র তিনি লাখমান টকাৰ ভিতৰতে এই পূজা অনুষ্ঠিত কৰা হ’ব৷ চৰকাৰৰ নিয়ম অনুসৰি পূজাভাগ আয়োজন কৰা হ’ব বুলি সদৰী কৰি তেওঁ কয় যে প্রৱেশ আৰু প্রস্থানৰ বাবে সুকীয়া গেট থাকিব৷ পূজা–র্চনাৰ সময়ত ভক্তসকলে যাতে সামাজিক দূৰত্ব ৰক্ষা কৰি চলিব পাৰে, তাৰ বাবে চিহ্ণ অংকন কৰি দিয়া হ’ব৷ একেদৰে সাধাৰণভাৱে পূজাৰ আয়োজন চলাইছে গীতানগৰ দুর্গাপূজা কমিটীয়েও৷ এই কমিটীৰ কোষাধ্যক্ষ ৰাজীৱ কলিতাই প্রকাশ কৰা অনুসৰি বিগত বর্ষৰ দৰেই এইবাৰো তেওঁলোকে দুর্গোৎসৱৰ আয়োজন কৰিছে৷

গীতানগৰতো নাথাকিব কোনো মণ্ডপ, আলোকসজ্জা, সাংস্কৃতিক অনুষ্ঠান৷ ইয়াৰ বিপৰীতে চৰকাৰীভাৱে প্রকাশ কৰা ক’ভিড বিধি মানি দুর্গাপূজা অনুষ্ঠিত কৰিব কমিটীয়ে৷ ২০১৯ চনত এই পূজাৰ বাজেট আছিল প্রায় ২৩ লাখ টকা৷

আনহাতে এছ এ’ পি মানি সাধাৰণ পূজাৰ আয়োজন কৰিছে ফাঁচীবজাৰ পূজা কমিটীয়েও৷ এই সন্দর্ভত কমিটীৰ হৈ সন্দীপ শর্মাই কয় যে এইবাৰো সাধাৰণভাৱে মণ্ডপ নির্মাণ কৰা হ’ব৷ প্রৱেশ–প্রস্থানৰ বাবে সুকীয়া গেট থাকিব৷ পূর্বৰ দৰে আলোকসজ্জাৰ ব্যৱস্থা নাথাকিব৷ ক’ভিড মহামাৰীৰ পূর্বে এই কমিটীয়ে ১২–১৩ লাখ টকা ব্যয়েৰে আয়োজন কৰিছিল৷ মহানগৰীৰ পূজাস্থলীসমূহৰ অন্যতম আকর্ষণৰ কেন্দ্রবিন্দু হৈছে পাণ্ডু ৰেষ্টকেম্প কালীবাৰী পূজা৷ আকর্ষণীয় মণ্ডপ–আলোকসজ্জাৰ বাবে প্রতিগৰাকী ভক্তৰ বাবে এই পূজা আকর্ষণৰ অন্যতম কেন্দ্রবিন্দু হৈ আহিছে৷ সর্বাধিক ২৪–২৫ লাখ টকা ব্যয়েৰে এই কমিটীয়ে দুর্গোৎসৱ আয়োজন কৰি আহিছে৷ কিন্তু ক’ভিড মহামাৰীৰ পৰিপ্রেক্ষিতত ৰেষ্টকেম্প কালীবাৰীতো এইবাৰ সাধাৰণভাৱেই পূজাৰ আয়োজন কৰা হৈছে বুলি সদৰী কৰিছে মন্দিৰ পৰিচালনা সমিতিৰ সাধাৰণ সম্পাদক তাপস নাহাই৷ তেওঁ প্রকাশ কৰা অনুসৰি, প্রায় ২ লাখ টকা বাজেটৰ ভিতৰতে এইবাৰ সাধাৰণভাৱে দুর্গোৎসৱ অনুষ্ঠিত কৰিব৷ মহানগৰীৰ আন দুর্গাপূজা কমিটীসমূহেও একে ধৰণৰ সিদ্ধান্তই গ্রহণ কৰিছে বুলি জানিব পৰা গৈছে৷ অর্থাৎ ক’ভিড পৰিস্থিতি উন্নতি ঘটিলেও মহানগৰীত এইবাৰো দেখা নাযাব পূর্বৰ দৰে দুর্গোৎসৱৰ উৎসাহ–উদ্দীপনা৷