🟢স্মৃতিগ্ৰন্থ তৌনায়গিৰ্ উন্মোচন
নিয়মীয়া বাৰ্তা, ১৪ ডিচেম্বৰ : কামৰূপ জিলাৰ সাতটা ৰাভা সংগঠন কামৰূপ জিলা ৰাভা ছাত্ৰ সন্থা, কামৰূপ জিলা ৰাভা মহিলা পৰিষদ, কামৰূপ জিলা ষষ্ঠ অনূসূচী দাবী সমিতি, কামৰূপ জিলা ৰাভা ৰাষ্ট্ৰীয় পৰিষদ,কামৰূপ জিলা ৰাভা সাহিত্য সভা, কামৰূপ জিলা ৰাভা কৃষ্টি সন্মিলন আৰু কামৰূপ জিলা ৰাভা কৰ্মচাৰী পৰিষদৰ উদ্যোগত বকোৰ জননেতা সব্যসাচী ৰাভা সমন্বয় ক্ষেত্ৰত বৃহস্পতিবাৰে দিনজোৰা বিভিন্ন কাৰ্যসূচীৰে জননেতা সব্যসাচী ৰাভাৰ ২২সংখ্যক মৃত্যু দিৱসটি উদযাপন কৰা হয়। জননেতাগৰাকীৰ মৃত্যুদিৱসৰ লগত সংগতি ৰাখি প্ৰথম কাৰ্যসূচী অনুসৰি পুৱা ৰাভাসকলৰ সাতোটা জাতীয় সংগঠনৰ একোখনকৈ পতাকা উত্তোলন কৰা হয়। কামৰূপ জিলা ৰাভা ছাত্ৰ সন্থাৰ পতাকা উত্তোলন কৰে জিলা ছাত্ৰ সন্থাৰ উপ সভাপতি নমল ৰাভাই, কামৰূপ জিলা ৰাভা মহিলা পৰিষদৰ হৈ জিলা উপ সভানেত্ৰী সাধনা ৰাভাই, কামৰূপ জিলা ষষ্ঠ অনূসূচী দাবী সমিতিৰ হৈ উপ সভাপতি কল্পনাথ ৰাভাই, কামৰূপ জিলা ৰাভা ৰাষ্ট্ৰীয় পৰিষদৰ হৈ সভাপতি ভীষ্মদেৱ ৰাভাই, কামৰূপ জিলা ৰাভা সাহিত্য সভাৰ হৈ উপ সভাপতি বীলেশ্বৰ ৰাভাই, কামৰূপ জিলা ৰাভা কৃষ্টি সন্মিলনৰ হৈ সভাপতি জ্যোতি প্ৰসাদ ৰাভাই আৰু কামৰূপ জিলা ৰাভা কৰ্মচাৰী পৰিষদৰ হৈ নৱ কুমাৰ ৰাভাই একোখনকৈ পতাকা উত্তোলন কৰে। ইয়াৰ পিছতে জননেতা গৰাকীলৈ শ্ৰদ্ধাঞ্জলি জ্ঞাপন কৰে কামৰূপ জিলা ষষ্ঠ অনূসূচী দাবী সমিতিৰ উপ সভাপতি ননীগোপাল ৰাভাই, জননেতাগৰাকীৰ প্ৰতিমূৰ্তিত মাল্যাৰ্পন কৰে ৰাভা ছাত্ৰ সন্থাৰ কেন্দ্ৰীয় সমিতিৰ প্ৰাক্তন সভাপতি গংগাৰাজ ৰাভাই। উল্লেখ্য যে জননেতা সব্যসাচী ৰাভাৰ মৃত্যু দিৱসৰ লগত সংগতি ৰাখি এখনি স্মৃতিচাৰণ সভা আৰু জননেতাগৰাকীৰ স্মৃতিত এখন স্মৃতিগ্ৰন্থও উন্মোচন কৰা হয়।স্মৃতিচাৰণ সভাত শামুকা জনতা হাইস্কুলৰ প্ৰধান শিক্ষক অমিয় ৰাভা,কেন্দ্ৰীয় ৰাভা ছাত্ৰ সন্থাৰ প্ৰতিষ্ঠাপক সভাপতি ড° কান্তা ৰাভা,ৰাভা ৰাষ্ট্ৰীয় পৰিষদৰ কেন্দ্ৰীয় সভাপতি বাবুল ৰাভাৰ লগতে বহুকেইজন বিশিষ্ট ব্যক্তিৰ লগতে কামৰূপ জিলাৰ সাতোটা ৰাভা জাতীয় সংগঠনৰ বিষয়ববীয়া সকল উপস্থিত থাকে।স্মৃতিচাৰণ সভাৰ মাজতে জননেতা গৰাকীৰ স্মৃতিত ‘তৌনায়গিৰ’ নামেৰে এখন স্মৃতিগ্ৰন্থ উন্মোচন কৰে ৰাভা ছাত্ৰ সন্থাৰ কেন্দ্ৰীয় সমিতিৰ আলোচনী সম্পাদক দেৱজিৎ নাফাই। ইয়াৰ লগতে সন্ধিয়া অন্তিম কাৰ্যসূচী অনুসৰি বন্তি প্ৰজ্বলন কৰে ৰাভা সাহিতা সভাৰ কেন্দ্ৰীয় সমিতিৰ উপ সভাপতি সত্যজিৎ ৰাভাই। দিনজোৰা বিভিন্ন কাৰ্যসূচীৰে জননেতা সব্যসাচী ৰাভাৰ ২২সংখ্যক মৃত্যু দিৱসটি সাতোটা সংগঠনৰ বিষয়ববীয়াই সূচাৰূৰূপে চলাই নিয়াত সহায় সহযোগিতা আগবঢ়োৱা বাবে কামৰূপ জিলা ৰাভা ছাত্ৰ সন্থাৰ সাধাৰণ সম্পাদক অশোক নাঙবাগে ধন্যবাদ জ্ঞাপন কৰে।
প্ৰেৰক প্ৰীতম বায়ন