বিশেষ বাৰ্তা, ২৭ ছেপ্টেম্বৰ : আজি সন্ধিয়া তিনিচুকীয়া চহৰৰ বৰপথাৰৰ মিছনপাৰাত এক বিধ্বংসী অগ্নিকাণ্ড সংঘটিত হয়৷ অগ্নিকাণ্ডটোত সাতটাৰো অধিক ৰন্ধন গেছৰ চিলিণ্ডাৰ বিস্ফোৰণ হোৱাৰ ফলত জুইয়ে অধিক বিধ্বংসী ৰূপ লয়। স্থানীয় ৰাইজে জানিব দিয়া অনুসৰি অগ্নিকাণ্ডটোত দহৰো অধিক বাসগৃহ জুইত জাহ যায়৷ একাংশই বৈদ্যুতিক বিজুতিৰ ফলত অগ্নিকাণ্ডটো সংঘটিত হোৱাৰ সন্দেহ প্ৰকাশ কৰিছে৷ অগ্নিকাণ্ড সংঘটিত হোৱা ঠাইত নিজা বাসগৃহৰ লগতে কেইবাটাও ভাড়াঘৰ আছিল৷ স্থানীয় ৰাইজে অগ্নিনিৰ্বাপক বাহিনীক খৱৰ দিয়াত ততাতৈয়াকৈ অগ্নিকাণ্ডস্থলীত স্থানীয় অগ্নিনিৰ্বাপক বাহিনীৰ গাড়ী উপস্থিত হৈ অগ্নিনিৰ্বাপন কৰিবলৈ যায় যদিও প্ৰবেশ পথটো সৰু হোৱাৰ বাবে ঘটনাস্থলীত উপস্থিত হ’ব নোৱাৰে। পৰৱৰ্তী সময়ত অগ্নিনিৰ্বাপক বাহিনীৰ সৰু বাহন উপস্থিত হৈ স্থানীয় ৰাইজৰ সহযোগত অগ্নি নিৰ্বাপনৰ চেষ্টা অব্যাহত ৰাখে, কিন্তু বাতৰি প্ৰেৰণ কৰা সময় পয্যন্ত অগ্নিকাণ্ডটো সম্পূৰ্ণ নিৰ্বাপিত হোৱা নাছিল ৷ অগ্নিকাণ্ড কেনেদৰে সংঘটিত হ’ল সেয়া জানিব পৰা হোৱা নাই যদিও ঘটনাস্থলীত তিনিচুকীয়াৰ সদৰ আৰক্ষী থানাৰ আৰক্ষী উপস্থিত হৈ আৰম্ভ কৰিছে তদন্ত ৷
প্ৰেৰক বিবেক বড়া