নিয়মীয়া বাৰ্তা, ১৮ ডিচেম্বৰ : দেশমাতৃক সেৱা কৰিবলৈ যোৱা বজালীৰ এগৰাকী জোৱানে যোৱাকালি দিনৰ ভাগত কৰ্তব্যৰত অৱস্থাত দুৰ্ভাগ্যজনকভাবে মৃত্যুক সাৱটি লবলগীয়া হোৱা ঘটনাই শোকস্তব্ধ কৰি তুলিছে গৃহভূমি বজালীক৷ ঘটনাৰ বিৱৰণী অনুসৰি বজালীৰ পাঠশালাৰ সমীপৱৰ্তী বৰবাং কুমাৰপাৰা নিৱাসী তথা হিমাচল প্ৰদেশত এছ এছ বিত কৰ্মৰত ধনজিৎ দাস নামৰ জোৱানজনে অইন দিনাৰ দৰে কালিও নিজৰ কৰ্তব্য পালন কৰি আছিল যদিও অসাৱধানবশত আৰু দুৰ্ভাগ্যজনকভাবে ৰাইফলৰ গুলী লাগি থিতাতে নিহত হয় জোৱানজন৷ দিনৰ প্ৰায় দুই বজাত সংঘটিত দুৰ্ভাগ্যজনক ঘটনাটোৰ খবৰ বিভাগীয়ভাৱে বিয়লিৰ ভাগত জনোৱাৰ পাছতে জোৱানজনৰ পৰিয়ালটোৰ মাজত হাহাকাৰ লাগে৷ মাত্ৰ দুমাহ পূৰ্বে বিবাহপাশত আৱদ্ধ হোৱা জোৱানগৰাকীৰ অস্বাভাৱিক মৃত্যুৱে সমগ্ৰ অঞ্চলটোত পেলাইছে শোকৰ ছাঁ পেলাইছে৷ ইপিনে জোৱানজনৰ মৃত্যু ৰহস্যজনক বুলি চৰ্চ্চা আৰম্ভ হোৱাৰ লগতে কাইলৈ পুৱাৰ ভাগত ধনজিতৰ নশ্বৰদেহ নিজ গৃহ আহি পাব বুলি জানিব পৰা গৈছে৷
প্ৰেৰক কল্যাণ কলিতা