বিশিষ্ট বিজ্ঞানী ড০ বিনয় কুমাৰ শইকীয়ালৈ শান্তি স্বৰূপ ভাটনাগৰ বঁটা

নিয়মীয়া বাৰ্তা ২৭ ছেপ্টেম্বৰঃ ভাৰতীয় বিজ্ঞান–প্রযুক্তি বিদ্যাৰ সর্বোচ্চ সন্মানৰ বাবে মনোনীত হৈছে আৰু এজন অসম সন্তান৷ বিশিষ্ট বিজ্ঞানী ড০ বিনয় কুমাৰ শইকীয়ালৈ চলিত বর্ষৰ শান্তি স্বৰূপ ভাটনাগৰ বঁটা আগবঢ়োৱা হৈছে৷ ‘ভূ, বায়ুমণ্ডল, মহাসাগৰ আৰু গ্রহ–গতি বিজ্ঞান’ শাখাত ড০ শইকীয়াই লাভ কৰিছে এই সন্মানীয় স্বীকৃতি৷ ড০ শইকীয়া সম্প্রতি কেন্দ্রীয় বিজ্ঞান আৰু প্রযুক্তি মন্ত্রালয়ৰ অধীনস্থ বৈজ্ঞানিক আৰু ঔদ্যোগিক গৱেষণা পৰিষদ (চি এছ আই আৰ)ৰ যোৰহাটস্থিত শাখা উত্তৰ–পূব বিজ্ঞান আৰু প্রযুক্তি বিদ্যা প্রতিষ্ঠান (এন ই আই এছ টি)ৰ বিজ্ঞানী হিচাপে কর্মৰত৷ ৰসায়ন বিজ্ঞানৰ পি এইচ ডি ডিগ্রীধাৰী ড০ শইকীয়াই কেইবাখনো বহুমূলীয়া গ্রন্থ ৰচনাৰে বিজ্ঞান জগতলৈ অনবদ্য অৱদান আগবঢ়াইছে৷ তদুপৰি তেওঁৰ ৬৫খনতকৈ অধিক গৱেষণা–পত্র ইতিমধ্যে প্রকাশ পাইছে৷ নিজৰ গৱেষণা আৰু কর্মৰ বাবে ড০ শইকীয়াই ইতিপূর্বে লাভ কৰিছে কেইবাটাও উল্লেখযোগ্য বঁটা আৰু ফেল’শ্বিপ৷ তাৰ ভিতৰত ২০১৫–১৬ বর্ষত ড০ আৰ পি ভাটনাগৰ বঁটা, ২০১৫ চনত ইণ্ডিয়ান ইনষ্টিটিউট অৱ মিনাৰেল ইঞ্জিনীয়ার্ছে আগবঢ়োৱা আই আই এম ই ক’ল বেনিফিকেচন বঁটা, ২০১৪ চনত মিনাৰেল ইঞ্জিনীয়াৰিং ছায়েন্স এছ’চিয়েচন অৱ ইণ্ডিয়া বঁটা, ২০১৫ চনত ৰাজীৱ গান্ধী উৎকর্ষতা বঁটাৰ কথা বিশেষভাৱে উল্লেখ কৰিব পাৰি৷

উল্লেখ্য যে বৈজ্ঞানিক আৰু উদ্যোগিক গৱেষণা পৰিষদে ১৯৫৮ চনৰ পৰাই ভাৰতীয় বিজ্ঞান–প্রযুক্তি বিদ্যাৰ সর্বোচ্চ সন্মান ৰূপে চিহ্ণিত শান্তি স্বৰূপ ভাটনাগৰ বঁটা প্রদান কৰি আহিছে৷ প্রধানতঃ ৭টা শাখা ক্রমে জীৱ বিজ্ঞান, ৰসায়ন বিজ্ঞান, ভূ, বায়ুমণ্ডল, মহাসাগৰ আৰু গ্রহ–গতি বিজ্ঞান, অভিযান্ত্রিক বিজ্ঞান, গণিত বিজ্ঞান, চিকিৎসা বিজ্ঞান আৰু পদার্থ বিজ্ঞানত এই বঁটা প্রদান কৰা হয়৷ ড০ শইকীয়া শান্তি স্বৰূপ ভাটনাগৰ লাভ কৰা পঞ্চমজন অসমীয়া৷ ড০ শইকীয়াৰ পূর্বে ১৯৮৯ চনত ৰসায়ন বিজ্ঞান শাখাত প্রথমবাৰলৈ অসমীয়া বিজ্ঞানী হিচাপে ড০ মিহিৰকান্তি চৌধুৰীয়ে শান্তি স্বৰূপ ভাটনাগৰ বঁটা লাভ কৰিছিল৷ তাৰ পাছত ‘ভূ, বায়ুমণ্ডল, মহাসাগৰ আৰু গ্রহ–গতি বিজ্ঞান’ শাখাত ১৯৯৪ চনত ড০ জিতেন্দ্র নাথ গোস্বামী, ১৯৯৫ চনত ড০ ভূপেন্দ্র নাথ গোস্বামী আৰু ২০০১ চনত প্রশান্ত গোস্বামীয়ে এই বঁটা লাভ কৰে৷ দীর্ঘবিৰতিৰ অন্তত ড০ শইকীয়াই শান্তি স্বৰূপ ভাটনাগৰ বঁটা লাভ কৰাৰ খবৰে স্বাভাৱিকতে অসমবাসীক গৌৰৱান্বিত কৰিছে৷ ড০ শইকীয়াক প্রদান কৰা এই স্বীকৃতিয়ে বিজ্ঞান আৰু প্রযুক্তিৰ ক্ষেত্রখনত অধ্যয়ন–গৱেষণাৰ প্রতি অসমৰ নতুন প্রজন্মক উৎসাহিত কৰিব বুলি ক’ব পাৰি৷
ড০ শইকীয়াক বিভিন্নজনৰ অভিনন্দন
আজি শান্তি স্বৰূপ ভাটনাগৰ বঁটা ঘোষণাৰ পাছতে ড০ বিনয় কুমাৰ শইকীয়াক অভিনন্দন জ্ঞাপন কৰে৷ উল্লেখ্য যে গোলাঘাট জিলাৰ জোনাকী নগৰৰ বীৰেন শইকীয়া আৰু বকুলী শইকীয়াৰ পুত্র ড০ বিনয় কুমাৰ শইকীয়াৰ জন্ম হৈছিল ১৯৭৭ চনত৷ সৰুপথাৰত প্রাথমিক শিক্ষা গ্রহণৰ পিছত স্থানীয় ডনবস্ক’ৰ পৰা সুখ্যাতিৰে হাইস্কুল শিক্ষান্ত পৰীক্ষাত উত্তীর্ণ হৈ তেওঁ গোলাঘাটৰ দেৱৰাজ ৰয় মহাবিদ্যালয়ত অধ্যয়ন কৰে৷ পাছত গুৱাহাটী বিশ্ববিদ্যালয়ৰ পৰা ৰসায়ন বিজ্ঞান বিভাগত স্নাতকোত্তৰ ডিগ্রী লাভ কৰা ড০ বিনয় কুমাৰ শইকীয়াই যোৰহাটস্থিত উত্তৰ–পূব বিজ্ঞান আৰু প্রযুক্তি বিদ্যা প্রতিষ্ঠানত গৱেষণা কৰি পিএইচডি ডিগ্রী লাভ কৰে৷ ড০ বিনয় কুমাৰ শইকীয়া সম্প্রতি যোৰহাটৰ বাসিন্দা৷ প্রধানমন্ত্রী নৰেন্দ্র মোদীয়ে নতুন দিল্লীৰ বিজ্ঞান ভৱনত কিছুদিনৰ ভিতৰত অনুষ্ঠিতব্য এক অনুষ্ঠানত আনুষ্ঠানিকভাৱে তেওঁক শান্তি স্বৰূপ ভাটনাগৰ বঁটা প্রদান কৰিব বুলি জানিব পৰা গৈছে৷