মাজুলীত ২৭ ফেব্ৰুৱাৰীত সৰ্বানন্দ সোণোৱাল-৩ মাৰ্চত মুখ্যমন্ত্ৰী মুখ্যমন্ত্ৰী ড০ হিমন্ত বিশ্ব শৰ্মাৰ প্ৰচাৰ

নিয়মীয়া বাৰ্তা, ২৫ ফেব্ৰুৱাৰীঃ মাজুলী সমষ্টিৰ উপ-নিৰ্বাচনৰ দিন চমু চাপি অহাৰ লগে লগেই ৰাজ্যৰ ৰাজনীতিত গুৰুত্বপূৰ্ণ হৈ পৰা সমষ্টিটোত ৰাজনৈতিক গৰম বতাহ বলিবলৈ ধৰিছে। বিভিন্ন ৰাজনৈতিক দলৰ হাইপ্ৰফাইল নেতাই ইতিমধ্যে সমষ্টিটোত ভিৰ কৰা পৰিলক্ষিত হৈছে। অনাগত সময়তো বহু নেতাই মাজুলীত নিজা নিজা প্ৰাৰ্থীৰ প্ৰচাৰ চলাবলৈ মাজুলীত উপস্থিত হ’বহি। উল্লেখ্য মাজুলীত বিজেপি মিত্ৰজোঁটৰ প্ৰাৰ্থী ভুৱন গাম আৰু বিৰোধী দলৰ উমৈহতীয়া প্ৰাৰ্থী চিত্তৰঞ্জন বসুমটাৰীৰ মাজতে মূল নিৰ্বাচনী যুঁজখন চলাটো নিশ্চিত হৈছে। দুয়োজন প্ৰাৰ্থীৰ সমৰ্থনত নিৰ্বাচনী প্ৰচাৰ চলাবলৈ ইতিমধ্যে বিভিন্ন নেতা উঠিপৰি লগা দেখা গৈছে। বিজেপি মিত্ৰজোঁটৰ প্ৰাৰ্থী ভুৱন গামৰ হৈ নিৰ্বাচনী প্ৰচাৰ চলাবলৈ অহা ২৭ ফ্ৰেব্ৰুৱাৰীত কেন্দ্ৰীয় মন্ত্ৰী, তথা প্ৰাক্তন মুখ্যমন্ত্ৰী সৰ্বানন্দ সোণোৱাল মাজুলীলৈ আহিব। কেন্দ্ৰীয় মন্ত্ৰী সোণোৱালে সেইদিনা মাজুলীত উপস্থিত হৈ প্ৰথমেই নামনি মাজুলীৰ মহৰিচুক জনজাতি হাইস্কুলৰ খেলপথাৰত দিনৰ ১২ বজাত এখন ৰাজহুৱা সভাত অংশগ্ৰহণ কৰি নিৰ্বাচনী প্ৰচাৰ চলাব। দিনৰ ২ বজাত সোণোৱালে দক্ষিণপাটত হ’ব লগীয়া দ্বিতীয়খন নিৰ্বাচনী প্ৰচাৰ সভাত অংশগ্ৰহণ কৰিব। সন্ধ্যা পাঁচ বজাত দক্ষিণ কমলাবাৰী গাঁও পঞ্চায়ত আৰু আউনীআটী সত্ৰত নিৰ্বাচনী প্ৰচাৰ চলাব প্ৰাক্তন মুখ্যমন্ত্ৰী সৰ্বানন্দ সোণোৱালে। বিজেপিৰ ৰাজ্যিক সভাপতি ভৱেশ কলিতায়ো ২৭ ফ্ৰেব্ৰুৱাৰীত মাজুলীত পৃথকে নিৰ্বাচনী প্ৰচাৰ চলাব। ভবেশ কলিতাই সেইদিনা দুপৰীয়া টটয়া মিলন সংঘত নিৰ্বাচনী প্ৰচাৰ চলোৱাৰ পাছত নতুনবজাৰৰ আন এখন নিৰ্বাচনী সভাত অংশগ্ৰহণ কৰিব। তেওঁ সেইদিনা সন্ধ্যা ৫ বজাত বিজেপিৰ মুখ্য কাৰ্যালয়ত দলীয় এখন সভাত অংশগ্ৰহণ কৰি কমলাবাৰীৰ নিৰিবিলি অতিথিশালাত ৰাত্ৰী যাপন কৰিব। একেদৰে মুখ্যমন্ত্ৰী ড০ হিমন্ত বিশ্ব শৰ্মাই অহা ৩ মাৰ্চত মাজুলীলৈ আহি নিৰ্বাচনী প্ৰচাৰ চলাব। বিজেপি মিত্ৰজোঁটৰ প্ৰাৰ্থী ভুৱন গামে আজি সতীৰ্থ সহ চিলাকলা আৰু শ্ৰীলুইত গাওঁ পঞ্চায়তৰ অন্তৰ্গত ১ নং বৰগঞা, ২ নং বৰগঞা, বৰুণচুক, কাকৰিকটা, বিৰিণাবাৰী, পহুমৰা, চিলাকলা, নতুন চাপৰি, নলদুৱাৰ, বৰদোৱা, মালাপিন্ধা, বৰমুকলি, ভালুকমৰা, গুৱালগাওঁ আৰু গোবিনপুৰত প্ৰচাৰ কাৰ্য চলায়৷ প্ৰাৰ্থী গাম সমৰ্থক সহ অঞ্চল সমূহত উপস্থিত হোৱাৰ লগে-লগে ভুৱন গাম জিন্দাবাদ, মুখ্যমন্ত্ৰী হিমন্ত বিশ্ব জিন্দাবাদ আদি শ্ল-গানেৰে মুখৰ কৰি তোলাৰ লগতে প্ৰাৰ্থী গৰাকীক বিপুল আদৰণি জনায়৷ প্ৰাৰ্থী গৰাকীক প্ৰচাৰ কাৰ্যত সহযোগিতা কৰে গণশক্তি দলৰ মাজুলী জিলা সভাপতি ৰঞ্জিত কুমাৰ দলে, অগপ দলৰ জিলা সম্পাদক ব্ৰজেন গাম, বিজেপি দলৰ ৰাজ্যিক কাৰ্যনিৰ্বাহক বীৰেন শইকীয়া প্ৰমুখ্যে কৰ্মীসকলৰ লগতে চিলাকলা গাওঁ পঞ্চায়তৰ সভাপতি খগেন দাস আৰু শ্ৰীলুইত গাওঁ পঞ্চায়তৰ সভানেত্ৰী বিজু কুলিয়ে৷ গামে মাজুলীৰ উন্নয়নৰ পক্ষত থাকি সকলোকে পদুমৰ চিনত ভোট দিবলৈ আহবান জনায়৷ সভাসমূহত গণশক্তি দলৰ ৰঞ্জিত কুমাৰ দলে, অগপ দলৰ ব্ৰজেন গামেও বিজেপি মিত্ৰজোঁটৰ প্ৰাৰ্থী গৰাকীক বিপুল ভাৱে ভোটদান কৰিবলৈ আৰু মাজুলীৰ উন্নয়নৰ অংশীদাৰ হ’বলৈ সকলোকে আহবান জনায়৷ ৰাজ্যিক কাৰ্যনিৰ্বাহক বীৰেন শইকীয়াই কয় বিজেপি মিত্ৰজোঁটৰ প্ৰাৰ্থী ভুৱন গামৰ বিজয় এশ শতাংশ নিশ্চিত৷ কেৱল আনুষ্ঠানিকতাহে বাকী বুলি উল্লেখ কৰি অভিলেখ সংখ্যক ভোটৰ ব্যৱধানত যাতে প্ৰাৰ্থী গৰাকী বিজয় হয় তাৰ প্ৰতি মনোনিৱেশ কৰিবলৈ সকলোকে আহবান জনায়৷ ইফালে কংগ্ৰেছ দলৰ প্ৰশাসনিক সাধাৰণ সম্পাদক অপূৰ্ব কুমাৰ ভট্টাচাৰ্য আৰু প্ৰদেশ কংগ্ৰেছ কমিটিৰ সম্পাদক অজয় ফুকনে আজি জেংৰাই আৰু ফুলনিত অনুষ্ঠিত সভাত অংশগ্ৰহণ কৰি বিৰোধীৰ উমৈহতীয়া প্ৰাৰ্থী চিত্ৰৰঞ্জন বসুমতাৰীৰ সপক্ষে নিৰ্বাচনী প্ৰচাৰ চলায় ৷ সমষ্টিটোৰ আনগৰাকী নিৰ্দলীয় প্ৰাৰ্থী এচ ইউ চি আই(কমিউনিষ্ট)ৰ ভাইটি ৰিচঙে গড়মূৰ তিনিআলিৰ দোকানে-দোকানে সোমাই ভোট ভিক্ষা কৰে৷

ডেৰ শতাধিকৰ বিজেপিত যোগদান

আজি ফুলনি ৰংগমঞ্চত হোৱা এখন বিজেপি মিত্ৰজোঁটৰ নিৰ্বাচনী সভাত কংগ্ৰেছৰ লগতে অন্যান্য দলৰ ডেৰ শতাধিক লোকে আনুষ্ঠানিক ভাৱে বিজেপি দলত যোগদান কৰে৷ সাংসদ প্ৰদান বৰুৱা, জিলা বিজেপিৰ সভাপতি লোকনাথ কুটুম, দেউৰী স্বায়ত্ত্ব শাসিত পৰিষদৰ মুখ্য কাৰ্যবাহী সদস্য মাধৱ দেউৰী, জিলা সম্পাদকদ্বয় দেৱব্ৰত দত্ত আৰু দেৱ মুদৈ উপস্থিত থকা উক্ত সভাত বিজেপি দলৰ প্ৰতি আনুগত্য প্ৰকাশ কৰাৰ লগতে মাজুলীৰ উন্নয়নৰ স্বাৰ্থত বিজেপি দলত যোগদান কৰা সকলক সাংসদ প্ৰদান বৰুৱা, মাধৱ দেউৰী, লোকনাথ কুটুমে দলীয় গামোচা আৰু দলীয় টুপী পিন্ধাই দললৈ আদৰণি জনায়। যোগদান কৰা সকলোকে দললৈ স্বাগতম জনায় সাংসদ বৰুৱাই সকলোকে দলৰ হকে নিষ্ঠাৰে কাম কৰি যোৱাৰ লগতে বিজেপি মিত্ৰজোঁটৰ প্ৰাৰ্থী গৰাকীয়ে যাতে অভিলেখ সংখ্যক ভোটৰ ব্যৱধানত জয়যুক্ত হয় তাৰ প্ৰতি মনোনিৱেশ কৰিবলৈ সকলোকে আহবান জনায় ৷

কালি মাজুলীলৈ ভূপেন বৰা, লুৰিণজ্যোতি গগৈ, অখিল গগৈ আৰু সাংসদ ৰাণী নৰহ

অসম জাতীয় পৰিষদৰ মনোনীত বিৰোধীৰ উমৈহতীয়া প্ৰাৰ্থী চিত্তৰঞ্জন বসুমতাৰীৰ হৈ নিৰ্বাচনী প্ৰচাৰ সভাত অংশগ্ৰহণৰ বাবে কালি মাজুলীলৈ আহিব অসম প্ৰদেশ কংগ্ৰেছ কমিটীৰ সভাপতি ভুপেন বৰা, অসম জাতীয় পৰিষদৰ সভাপতি লুৰিণজ্যোতি গগৈ, ৰাইজৰ দলৰ সভাপতি অখিল গগৈ আৰু ৰাজ্যসভাৰ সাংসদ ৰাণী নৰহ ৷ তেওঁলোকে দিনৰ ১১ বজাত উজনি মাজুলী মিলন সংঘ, নয়াবজাৰ আৰু বিয়লি ৩ বজাত বালিচাপৰিৰ মিলিত কৃষ্টি সংঘত হ’বলগীয়া নিৰ্বাচনী প্ৰচাৰ সভাত অংশগ্ৰহণ কৰিব৷

প্ৰেৰক ৰূপজ্যোতি বৰা