নিয়মীয়া বাৰ্তা ডিজিটেল, ৫ এপ্ৰিলঃ এনআৰচিৰ প্রাক্তন ৰাজ্যিক সমন্বয়ক প্রতীক হাজেলাৰ বিৰুদ্ধে অৱশেষত ৰুজু হৈছে গোচৰ৷ আদালতৰ নির্দেশত দিছপুৰ আৰক্ষী থানাই ৩০৯/২৫ নম্বৰত গোচৰটো ৰুজু কৰে বুলি জানিব পৰা গৈছে৷ উল্লেখ্য যে অসমীয়া জাতিৰ দলিলস্বৰূপ ৰাষ্ট্রীয় নাগৰিকপঞ্জী প্রস্তুতিৰ সময়ত হোৱা ব্যাপক খেলিমেলিৰ বাবে তদানীন্তন ৰাজ্যিক সমন্বয়ক প্রতীক হাজেলাৰ বিৰুদ্ধে বহু অভিযোগ উত্থাপন হৈছিল৷ ৰাজ্য চৰকাৰক উক্ত খেলিমেলিৰ তদন্তৰ দাবী জনাই বিগত ২০২২ বর্ষৰ পৰা কেইবাজনো ব্যক্তিয়ে বহুকেইখন এজাহাৰ দাখিল কৰিছিল৷ ইয়াৰ ভিতৰত এনআৰচিৰ প্রাক্তন ৰাজ্যিক সমন্বয়ক হিতেশ দেৱশর্মাই দুখন, আছাম পাব্লিক ৱর্কছৰ সভাপতি অভিজিৎ শর্মাই এখন আৰু প্রযোজক তথা উদ্যোগী লুইত কুমাৰ বর্মনেও প্রতীক হাজেলাৰ কেলেংকাৰিৰ তদন্ত বিচাৰি এজাহাৰ দাখিল কৰিছিল৷ কেইবাখনো এজাহাৰ দাখিলৰ পাছতো আৰক্ষীয়ে গোচৰ পঞ্জীয়ন কৰা নাছিল যদিও আদালতৰ নির্দেশত মহানগৰ আৰক্ষীয়ে গোচৰ ৰুজু কৰিবলৈ বাধ্য হয়৷