নিয়মীয়া বাৰ্তা ১৬ জুনঃ কিডনী ষ্ট’নত আক্রান্ত হৈ দেওবাৰৰ পৰা চিকিৎসা গ্রহণ কৰি বিশ্রামত থকা স্বাস্থ্যমন্ত্রী ড০ হিমন্ত বিশ্ব শর্মা ক্রমাৎ সুস্থ হৈ উঠিছে৷ সোমবাৰে দিনটো বিশ্রামত থকাৰ পিছত আজিৰে পৰা তেওঁ পুনৰ স্বাভাৱিকভাৱে চলা–ফুৰা কৰিব পৰাৰ আশা কৰা হৈছে৷ গুৱাহাটী মেডিকেল কলেজ হাস্পতালৰ অধীক্ষক ডাঃ অভিজিৎ শর্মাই সংবাদ মাধ্যমৰ আগত প্রকাশ কৰা অনুসৰি, মন্ত্রী ড০ শর্মা বর্তমান ক্রমাৎ সুস্থ হৈ উঠিছে৷ সোমবাৰৰ দিনটো তেওঁ সম্পূর্ণ বিশ্রামত থাকিব লাগিব৷ আজি তেওঁক দুটা চেলাইন দিয়া হ’ব৷ শৰীৰত এতিয়া তেওঁৰ কোনো বিষ নাই৷ চিকিৎসকৰ দলে নিয়মিত তেওঁৰ স্বাস্থ্য পৰীক্ষা কৰি আছে আৰু প্রয়োজনীয় দৰব দিছে৷ তেওঁৰ কোনো অপাৰেচনৰ প্রয়োজন নাই বুলি উল্লেখ কৰি ডাঃ শর্মাই কয় যে কিডনীত জমা হোৱা পাথৰ উলিয়াবৰ বাবে দৰব দিয়া হৈছে৷ সোমবাৰৰ পৰা তেওঁ পূর্বৰ দৰেই চলা–ফুৰা কৰিব পাৰিব বুলি প্রকাশ কৰে৷ অৱশ্যে চিকিৎসকে তেওঁ আৰু দুই–তিনি দিন বিশ্রামত থকাটো বিচাৰে৷