🔹 নিৰপেক্ষ দৃষ্টিভংগীৰে সমাজৰ উন্নয়নৰ হকে কলম চলোৱাটোহে সাংবাদিকৰ ধৰ্ম- কাৰ্যবাহী সদস্য দিগন্ত বৰুৱা
নিয়মীয়া বাৰ্তা, ৩ ছেপ্টেম্বৰ : ওদালগুৰি জিলাৰ অন্যতম সাংবাদিক সংগঠন কলাইগাঁও মিডিয়া চাৰ্কোলৰ এটা আটকধুনীয়া কাৰ্যালয়ৰ আজি শুভ উদ্বোধন কৰা হয় । এক মাংগলিক পৰিৱেশত কাৰ্যালয়টি আনুষ্ঠানিকভাৱে শুভ উদ্বোধন কৰে বি টি চিৰ কাৰ্যবাহী সদস্য দিগন্ত বৰুৱাই । কাৰ্যালয় শুভ উদ্বোধনী অনুষ্ঠানত ভাগ লৈ ভাৰতীয় জনতা পাৰ্টীৰ প্ৰতিনিধি তথা বি টি চিৰ কাৰ্যবাহী সদস্য দিগন্ত বৰুৱাই সাধাৰণ মানুহতকৈ সাংবাদিকসকলৰ সমাজৰ প্ৰতি দায়বদ্ধতা অধিক বুলি মন্তব্য কৰি কয় যে কেৱল আক্ৰোশ পূৰণৰ বাবে পক্ষপাতিত্বৰে বাতৰি পৰিৱেশন কৰাটো সাংবাদিকৰ ধৰ্ম নহয় । পক্ষপাতদুষ্ট চৰিত্ৰ পৰিহাৰ কৰি নিৰপেক্ষ দৃষ্টিভংগীৰে সমাজখনৰ উন্নয়নৰ হকে কলম চলোৱাটোহে সাংবাদিকৰ প্ৰকৃত ধৰ্ম । কলাইগাঁও মিডিয়া চাৰ্কোলৰ সভাপতি তথা জ্যেষ্ঠ সাংবাদিক গিৰীশ শৰ্মাৰ সঞ্চালনাত অনুষ্ঠিত উদ্বোধনী অনুষ্ঠানত অংশ লৈ জ্যেষ্ঠ সাংবাদিক ময়ূখ গোস্বামীয়ে কয়- সাংবাদিকসকলে সদায়ে প্ৰত্যাহ্বান গ্ৰহণ কৰি সাহসেৰে কলম চলাই যাব লাগিব । সামাজিক সুৰক্ষা আৰু আৰ্থিক নিৰাপত্তাৰ বাবেও সাংবাদিকসকলে ঐক্যবদ্ধভাৱে যুঁজ কৰি যাব লাগিব বুলিও তেওঁ মন্তব্য কৰে । গাম্ভীৰ্যপূৰ্ণ অনুষ্ঠানত জ্যেষ্ঠ সাংবাদিক জয়ন্ত কুমাৰ দাস, ভাৰ্গৱ কুমাৰ দাস আৰু আৰক্ষী বিষয়া খৰ্গেশ্বৰ বৰদলৈয়ো সংবাদ ক্ষেত্ৰখনৰ কেতবোৰ দিশ ফঁহিয়াই বক্তব্য প্ৰদান কৰে । কলাইগাঁও মিডিয়া চাৰ্কোলৰ সাধাৰণ সম্পাদক ফাইজুল হুছেইনে আঁত ধৰা উক্ত গাম্ভীৰ্যপূৰ্ণ অনুষ্ঠানত স্থানীয় বিধায়ক দুৰ্গা দাস বড়ো, কলাইগাঁৱৰ বিশিষ্ট নাগৰিক কমল প্ৰসাদ শৰ্মা, প্ৰতাপ ভট্ট, টংলাৰ বিশিষ্ট নাগৰিক হেমন্ত বৰা কোচ, সাংবাদিক বাপন শৰ্মা, হেমন্ত বৰুৱা, মোচাদ্দিক হুছেইন, দীপক ডেকা, অখিল কলিতাকে ধৰি ভালেসংখ্যক বিশিষ্ট ব্যক্তি উপস্থিত থাকে ।
প্ৰেৰক ধীৰেন মহলীয়া