নিয়মীয়া বাৰ্তা, ৪ এপ্ৰিল : কালি নিশা ধুবুৰী আৰক্ষীৰ অভিযানত আইপিএলৰ জুৱাৰ সৈতে জড়িত থকাৰ অভিযোগত এজন লোক কৰায়ত্ত হোৱা বুলি জানিব পৰা গৈছে। জানিব পৰা মতে, এক গোপন তথ্যৰ ভিত্তিত ধুবুৰী সদৰ থানাৰ আৰক্ষীৰ এটি দলে চহৰখনৰ নিউঘাট অঞ্চলত অভিযান চলাই কৰায়ত্ত কৰে ৰহিম আলী নামৰ ব্যক্তিজনক। ধুবুৰী চহৰৰ পাৰ্শ্বৱৰ্তী আয়ৰণ জংলা ৩য় খণ্ডৰ বাসিন্দা ধৃত আলীৰ পৰা আৰক্ষীয়ে নগদ ৩০,২৪০ টকা আৰু দুটাকৈ মোবাইল ফোন জব্দ কৰা বুলি জানিব পৰা গৈছে। উল্লেখনীয় যে ধুবুৰীকে ধৰি জিলাখনৰ একাংশ অঞ্চলত বহিঃৰাজ্যৰ পৰা নিয়ন্ত্রিত হোৱা আইপিএল জুৱাৰ এক বিশেষ ছিণ্ডিকেট চক্ৰ সক্ৰিয় হৈ থকাৰ দীৰ্ঘদিনীয়া অভিযোগ আছে। আনকি আইপিএলৰ জুৱাত সৰ্বস্বান্ত হৈ কেইবাগৰাকী চফল যুৱকে চৰম পথ ল’বলগীয়াও হোৱাৰ দৰে ঘটনা সংঘটিত হৈছে।