বিশেষ বাৰ্তা, ২১ ছেপ্টেম্বৰঃ চন্দ্ৰযান-৩ মিছনৰ বিক্ৰম লেণ্ডাৰ আৰু প্ৰজ্ঞান ৰভাৰ শ্লিপিং মোডৰ পৰা কাইলৈ ওলাই আহিব। ১৬ দিন শ্লিপিং মোডত থকাৰ পিছত কাইলৈ ইছৰ’ই সক্ৰিয় কৰিব লেণ্ডাৰ আৰু ৰভাৰ। ইছৰোৰ সঞ্চালক নীলেশ দেশাইয়ে সংবাদ সংস্থা পিটিআইক জনাইছে যে ২২ ছেপ্টেম্বৰত লেণ্ডাৰ আৰু ৰভাৰ দুয়োটাকে সক্ৰিয় কৰাৰ চেষ্টা কৰা হব আৰু যদি আমাৰ ভাগ্য ভাল হয় তেন্তে সেয়া হ’ব। আমি আৰু কিছু পৰীক্ষামূলক তথ্য পাম যিবোৰ চন্দ্ৰৰ পৃষ্ঠৰ অধিক অনুসন্ধানত উপযোগী হ’ব। চন্দ্ৰযান-৩ মিছনৰ সন্দৰ্ভত আজি লোকসভাত কেন্দ্ৰীয় মন্ত্ৰী জিতেন্দ্ৰ সিঙে কয় যে দেশে এতিয়া প্ৰজ্ঞান আৰু বিক্ৰমে কেইঘণ্টামানৰ পিছত টোপনিৰ পৰা সাৰ পোৱাৰ বাবে অপেক্ষা কৰি আছে, এবাৰ এনেকুৱা হ’লে ভাৰতবৰ্ষ প্ৰথমখন দেশ হিচাপে পৰিগণিত হ’ব এই কৃতিত্ব অৰ্জন কৰিবলৈ বিশ্বদৰবাৰত। কেন্দ্ৰীয় মন্ত্ৰীগৰাকীয়ে কয় যে চন্দ্ৰৰ ১৪ দিনীয়া নিশা শেষ হ’বলৈ ওলাইছে আৰু আমি তাত সূৰ্য্য উদয়ৰ বাবে আগ্ৰহেৰে অপেক্ষা কৰি আছো আৰু তাৰ লগে লগে বিক্ৰম আৰু প্ৰজ্ঞান সক্ৰিয়কৰণৰ বাবেও অপেক্ষা কৰি আছো। চলিত মাহৰ আৰম্ভণিতে ক্ৰমে ৪ আৰু ২ ছেপ্টেম্বৰত লেণ্ডাৰ আৰু ৰভাৰ দুয়োখনেই শ্লিপিং মোডত ৰখা হৈছিল। লেণ্ডাৰ আৰু ৰভাৰ দুয়োখনেই থকা চন্দ্ৰৰ দক্ষিণ মেৰু অঞ্চলত সূৰ্যৰ পোহৰ ঘূৰি আহিব আৰু তেওঁলোকৰ সৌৰ পেনেল অতি সোনকালে চাৰ্জ হ’ব বুলি আশা কৰা হৈছে। ইছৰো এতিয়া পুনৰ যোগাযোগ স্থাপন আৰু স্বাস্থ্য পৰীক্ষা কৰিবলৈ সাজু হৈছে। নীলেশ দেশাইয়ে ক’লে যে আমি লেণ্ডাৰ আৰু ৰভাৰ দুয়োখনেই শ্লিপিং মোডত ৰাখিলোঁ কাৰণ তাপমাত্ৰা মাইনাছ ১২০-২০০ ডিগ্ৰী চেলছিয়াছলৈ নামি যাব বুলি আশা কৰা হৈছে। চন্দ্ৰত সূৰ্য্য উদয় হোৱাৰ লগে লগে আমি আশা কৰিছো যে ২২ ছেপ্টেম্বৰৰ ভিতৰত সৌৰ পেনেল আৰু অন্যান্য বস্তু সম্পূৰ্ণৰূপে চাৰ্জ হ’ব। সেয়েহে আমি লেণ্ডাৰ আৰু ৰভাৰ দুয়োটাকে সক্ৰিয় কৰিবলৈ চেষ্টা কৰিম। ভাৰতৰ চন্দ্ৰযান-৩ অভিযানে ২৩ আগষ্টৰ সন্ধিয়া চন্দ্ৰৰ দক্ষিণ মেৰুত সফল কোমল অৱতৰণ কৰে। ইয়াৰ লগে লগে ভাৰত চন্দ্ৰৰ এই অংশত উপনীত হোৱা প্ৰথম দেশ হিচাপে পৰিগণিত হয়। চন্দ্ৰত অৱতৰণ কৰাৰ পিছত বাহনখনত থকা লেণ্ডাৰ আৰু ৰভাৰ আৰু অন্যান্য পেলোডে অতি গুৰুত্বপূৰ্ণ তথ্য প্ৰেৰণ কৰে। লেণ্ডাৰ আৰু ৰভাৰখন চন্দ্ৰৰ এটা দিন (প্ৰায় ১৪ দিন)ৰ বাবে চলিব পৰাকৈ ডিজাইন কৰা হৈছিল।