🎯 সত্যনিষ্ঠ বাতৰিক সমাজে সদায় আঁকোৱালি লয় : ড০ জ্যোতিপ্ৰসাদ দাস
বিশেষ বাৰ্তা, ২১ আগষ্টঃ আজিৰ সমাজত তথ্য সমৃদ্ধ আৰু অনুসন্ধানমূলক বাতৰিয়েহে দৰ্শক আৰু পঢ়ুৱৈক অধিক আকৰ্ষিত কৰে। সত্যনিষ্ঠ বাতৰিক সমাজে সদায় আঁকোৱালি লয়। এই মন্তব্য গুৱাহাটীৰ প্ৰাগজ্যোতিষ মহাবিদ্যালয়ৰ অধ্যাপক ডঃ জ্যোতিপ্ৰসাদ দাসৰ।মুকালমুৱাত ‘নিয়মীয়া বাৰ্তা’ কাকতৰ মুকালমুৱাৰ জ্যেষ্ঠ সাংবাদিক তথা বৰক্ষেত্ৰী প্ৰেছ ক্লাৱৰ সভাপতি প্ৰদীপ কুমাৰ কলিতাক ৰাজ্য চৰকাৰে এইবেলি সাংবাদিক পেন্সনাৰ হিচাপে ঘোষণা কৰা উপলক্ষে আয়োজিত এখন সম্বৰ্ধনা সভাত উপস্থিত থাকি ডঃ দাসে পুনৰ কয় যে এটা সময়ত মফচলীয় সাংবাদিকসকলে বহু কষ্ট কৰি সংবাদ সংগ্ৰহ কৰি পৰিবেশন কৰিছিল। এতিয়া সামাজিক মাধ্যমৰ যুগত ইলেকট্ৰনিক মিডিয়া আৰু প্ৰিন্ট মিডিয়াই সমানে জনপ্ৰিয়তা ফেৰ মাৰি চলি থকাটো সংবাদ সেৱাৰ বাবে শুভ লক্ষণ। লোকনিৰ্মাণ (গৃহ) বিভাগৰ মুকালমুৱাস্থিত জিৰণি চ’ৰাত মুকালমুৱাৰ জ্যেষ্ঠ সাংবাদিক ৰাজেন ডেকাৰ সভাপতিত্বত বৰক্ষেত্ৰী প্ৰেছ ক্লাৱে আয়োজন কৰা সম্বৰ্ধনা সভাখনত ভাষণ দি অৱসৰপ্ৰাপ্ত শিক্ষক জগদা চৰণ তালুকদাৰে কয় যে বৰক্ষেত্ৰীৰ দৰে এখন অনগ্ৰসৰ ঠাইৰ প্ৰদীপ কুমাৰ কলিতাৰ দৰে এগৰাকী উচ্চ শিক্ষিত সাংবাদিকে অসম চৰকাৰৰ এইবাৰৰ ঘোষিত সাংবাদিক পেন্সনাৰ তালিকাত নাম অন্তৰ্ভুক্ত হোৱাত স্বাভাৱিকতে বৰক্ষেত্ৰীৰ ৰাইজে আনন্দ লাভ কৰিছে। সভাত বৰপেটা জিলাৰ চেঙাৰ শিক্ষা বিষয়া ৰাজেন্দ্ৰ কলিতা, সমাজকৰ্মী উমাচৰণ মেধি বৰক্ষেত্ৰীৰ প্ৰাক্তন ছাত্ৰনেতা চাধুল্লা আলী,মানস তালুকদাৰেও ভাষণ দিয়ে। প্ৰেছ ক্লাৱৰ সম্পাদক সুভাষ কাকতিয়ে আঁত ধৰা সভাখনত সাংবাদিক পেন্সনাৰ প্ৰদীপ কুমাৰ কলিতাক বৰক্ষেত্ৰী প্ৰেছ ক্লাৱৰ পৰা গামোচা, চেলেং চাদৰ, এটা ফুলাম জাপি, এখনি শৰাই আৰু মানপত্ৰৰে সম্বৰ্ধনা জনোৱা হয়। সম্বৰ্ধনা সভাখনত অঞ্চলটোৰ কেবাটাও অনুষ্ঠান-প্ৰতিষ্ঠান আৰু সাংবাদিক পেন্সনাৰগৰাকীক গামোচা আৰু উপহাৰ প্ৰদান কৰি সম্বৰ্ধনা জনোৱা হয়।উল্লেখ্য যে অসম চৰকাৰে ৰাজ্যৰ ২০গৰাকী সাংবাদিকক এই বৰ্ষৰ বাবে সাংবাদিক পেঞ্চন ঘোষণা কৰে। ২০গৰাকী পেঞ্চনপ্ৰাপ্ত সাংবাদিকৰ তালিকাত নাম অন্তৰ্ভুক্ত হৈছে ‘নিয়মীয়া বাৰ্তা’ কাকতৰ মুকালমুৱাৰ সাংবাদিক হিচাপে সংবাদসেৱা কৰি থকা প্ৰদীপ কুমাৰ কলিতা।দুই কুৰিৰো অধিককাল ধৰি সংবাদ সেৱা কৰি অহাৰ লগতে বিভিন্ন আলোচনীত লেখা-মেলা কৰি অহা উচ্চ শিক্ষিত প্ৰদীপ কুমাৰ কলিতাক ৰাজ্য চৰকাৰে ‘সাংবাদিক পেঞ্চন’ প্ৰদান কৰাত ৰাজ্যৰ মফচলীয় সাংবাদিক সকলৰ ঐক্য মঞ্চ ‘অসম প্ৰদেশ সাংবাদিক সন্থা’ই গভীৰ সন্তোষ প্ৰকাশ কৰিছে। সন্থাৰ প্ৰদীপ কুমাৰ কলিতাকে ধৰি মুঠ তিনিগৰাকী সাংবাদিকে এই পৰ্যন্ত সাংবাদিক পেঞ্চন পাবলৈ সক্ষম হৈছে।
প্ৰেৰক অৰূপ ৰঞ্জন বৰ্মন